Буюк Британиялик Стив Верзе дунёда 3D-принтерда ишланган кўз ўрнатилган биринчи одам бўлди. Бу ҳақда CNN хабар бермоқда.
Лондонлик 47 ёшли муҳандис Стив Верзе рақамли чап кўз протезига эга бўлди.
«Сунъий кўз реал кўринишга эга ва кўз қорачиғининг ҳақиқий чуқурлигига эга бўлиши учун мўлжалланган», деб ёзди CNN тиббиёт ходимларидан иқтибос келтирган ҳолда.
Аввалига 3D тасвир Германияга босиб чиқариш учун юборилган. Сўнгра тайёр маҳсулот Буюк Британияга қайтариб жўнатилган. Иш у ердаги Moorfields кўз касалхонасининг оптометристи томонидан якунланган ва сайқалланган.
Бундай протезни яратишда шифокорлар рақамли қурилма ёрдамида беморнинг орбитаси ва функционал кўзини сканерлайди.
«Мен 20 ёшимдан бери протездан фойдаланаман ва ўзимни доимо ноқулай ҳис қилардим», — дейди бемор Верзе.
Moorfields кўз касалликлари шифохонасининг маълум қилишича, 3D босиб чиқариш протез яратиш учун кетадиган вақтни уч ҳафтага қисқартиради — бу одатдаги вақтнинг ярмига тенг. Касалхона вакили, шунингдек, тез орада кўпроқ беморлар билан клиник синовлар бошланишини айтди.
Лондон Университет коллежининг офтальмология ва кўз онкологияси профессори Мандип Сагу ўз баёнотида янги протезлаш усулининг имкониятларидан мамнун эканини айтди.
