Кредит, шу жумладан микроқарз рекламасида қарз мажбуриятларини бажармаслик молиявий хатарларга олиб келиши мумкинлиги ҳақида огоҳлантириш бўлиши шарт. Бу талаб 2026 йил 10 ноябрдаги ЎРҚ–1187-сонли қонун билан «Реклама тўғрисида»ги қонунга киритилди, деб хабар берди Адлия вазирлигининг «Ҳуқуқий ахборот» канали.
Огоҳлантириш рекламанинг асосий майдони ва вақтининг камида 10 фоизини эгаллаши керак.
Масалан, 30 сониялик видеорекламада огоҳлантириш камида 3 сония кўрсатилиши, газета ёки баннердаги рекламада эса майдоннинг камида ўндан бир қисмини эгаллаши лозим бўлади.
Микроқарз — микромолия ташкилотлари ва банклар аҳолига берадиган кичик ҳажмдаги қарз.
Янги талаб қачондан кучга кириши ва уни бузганлик учун қандай жавобгарлик белгиланиши хабарда айтилмаган.
Олдинроқ Рақобат қўмитаси ижтимоий тармоқларда реклама қонунчилигини бузган 12 нафар блогерни жавобгарликка тортганди.
