Hyundai компанияси Seven электр кроссоверини намойиш қилди. Бу ҳақда «Коммерсантъ» нашри хабар бермоқда.
Маълум қилинишича, ўзи бошқариладиган автомобиль E-GMP платформасида қурилган бўлиб, бошқа Hyundai Ioniq концепт-карлари ва Ioniq 5 моделидан илҳомланиб ясалган кузов дизайнига эга. Прототипда пикселли оптика ва фаол аэродинамик элементларга эга ғилдирак жантлари мавжуд.
Hyundai Seven уч қатордан иборат ўриндиқли салонга эга бўлиб, унга электромобилнинг ўнг томонидаги бир-бирига қараган эшиклар орқали кирилади. Корпуснинг чап томонидаги алоҳида эшик ҳайдовчи ўриндиғига олиб боради. Безатиш учун қайта ишланган материаллардан фойдаланилган.
Шунингдек, Seven электрокроссовери музлатгич ва пойабзалларни сақлаш учун махсус бўлимга эга. Панорамали том эса проекция экрани вазифасини бажаради. Машинага олд ва орқа йўловчилар учун ҳаво оқимини изоляция қилувчи Hygiene Airflow System тизими ўрнатилган.
Аввалроқ Hyundai компанияси Seven кроссовери тизерини эълон қилганди.
