Markaziy bank kredit reklamalari va kredit shartnomalarida qarz oluvchilar uchun moliyaviy xatarlar haqidagi ogohlantirishlarni majburiy joylashtirishni taklif qilmoqda.
Loyihaga koʻra, kredit reklamasida “kredit boʻyicha majburiyatlarni bajarmaslik moliyaviy xatarlarni yuzaga keltirishi mumkin” degan mazmundagi ogohlantirish boʻlishi kerak.
U reklama maydoni yoki vaqtining kamida 10 foizini egallashi lozim.
Kredit shartnomasida esa ogohlantirish uchun yanada katta joy ajratiladi – u shartnoma birinchi qismining asosiy yuzasini kamida 30 foizini egallashi lozim.
Ogohlantirishda kreditni oʻz vaqtida toʻlamaslik qarz miqdorining oshishi, majburiy undiruv choralari, mol-mulkka undiruv qaratilishi, hisobvaraqlardagi mablagʻlarni xatlash hamda kredit tarixiga salbiy taʼsir qilishi mumkinligi koʻrsatiladi.
Yana bir muhim taklif: agar bank taklif etayotgan kredit mahsuloti isteʼmolchini chalgʻituvchi deb topilsa, Markaziy bank bankning ayrim moliyaviy operatsiyalarini yoki infratuzilmasini kengaytirishni 6 oygacha cheklashi yoki taqiqlashi mumkin.
