Ўзбекистон Республикаси Марказий банки Самарқанд шаҳрида ўтказиладиган 46-Бутунжаҳон шахмат олимпиадасига бағишланган олтин ва кумуш эсдалик тангаларини муомалага чиқаради.
Самарқанд мезбонлик қиладиган нуфузли шахмат олимпиадасига бағишланган олтин ва кумуш эсдалик тангалари тарих, миллий меъморчилик ва шахмат тафаккурини ягона бадиий композицияда бирлаштиради.
«Икки танга — бир Регистон» концепцияси асосида яратилган тангалар ёнма-ён қўйилганда Регистон майдони пештоқининг яхлит тасвирини ҳосил қилади. Нафис миллий нақшлар ва шахмат доналари эса халқимизнинг бирдамлиги, заковати ва бунёдкорлик салоҳиятини ифодалайди.
Тангаларнинг аверсида Самарқанд шаҳридаги Тиллакори мадрасасининг меъморий элементлари тасвирланган бўлиб, композиция шахмат доналари билан бойитилган. Унда меъморий шакллар билан уйғунлашган шахмат доналари силуэти ва геометрик нақшлар акс этган. Мазкур элементлар стратегик тафаккур, интеллектуал етакчилик, жамоавий бирлик ҳамда шарқона меъморий мерос ғояларини ифодалайди. Шунингдек, олтин танганинг аверсида «46-Бутунжаҳон Шахмат Олимпиадаси Самарқанд-2026», кумуш танганинг аверсида эса «46th Fide Chess Olympiad Samarkand-2026» ёзувлари жойлаштирилган.
Тангаларнинг реверс тарафида Халқаро шахмат федерацияси (Fide) логотипи марказий элемент сифатида акс эттирилган. Шунингдек, олтин тангада «Ўзбекистон Республикаси Марказий банки», кумуш тангада эса «Central Bank of the Republic of Uzbekistan» ёзувлари ҳамда номинал қиймати кўрсатилган.
Эсдалик тангалари 999,9 асилликдаги олтин (Au) ва кумушдан (Ag) зарб этилади. Ҳар бир танганинг оғирлиги 31,1 грамм, номинал қиймати эса 100 000 сўмни ташкил этади.
Тангалар дастлаб 100 дона олтин ва 500 дона кумуш нусхада чиқарилади. Бозор талаби ва коллекционерлар қизиқишидан келиб чиқиб, тангалар тиражи босқичма-босқич амалга оширилиши мумкин.
46-Бутунжаҳон шахмат олимпиадасига бағишланган ушбу эсдалик тангалари Самарқанднинг бетакрор меъморий мероси ва шахматнинг умумбашарий интеллектуал қадриятларини бир композицияда мужассам этади. Тангалар халқаро шахмат байрамининг нумизматик тимсоли сифатида тарих, маданият ва шахматга қизиқувчилар, шунингдек, ноёб эсдалик ва коллекцион буюмларни қадрловчилар учун мўлжалланган.
