Ўзбекистоннинг ялпи халқаро захиралари октябрь ойида 2,96 млрд долларга, яъни 4,5 фоизга камайиб, 1 ноябрь ҳолатига кўра 63,63 млрд долларни ташкил этди. Бу ҳақда Марказий банк маълум қилди.
Халқаро захиралар — Марказий банк ихтиёридаги олтин, хорижий валюта ва бошқа ташқи активлар. Улар бозор нархида ҳисобланади, шунинг учун олтин нархининг ўзгариши захиралар ҳажмига бевосита таъсир қилади.
Марказий банк маълумотига кўра, октябрь давомида олтиннинг бир трой унцияси нархи 4 188,75 доллардан 3 981,10 долларгача тушган. Бунинг захираларга таъсири –3 млрд долларни ташкил этган.
Захиралардаги олтин қиймати бир ойда 2,04 млрд долларга камайиб, 58,04 млрд долларга тушди. Шу билан бирга, олтиннинг соф ҳажми 14,34 млн трой унциядан 14,58 млн трой унцияга, яъни тахминан 7,3 тоннага ошди. Олтин жами захираларнинг 91,2 фоизини ташкил этади.
Хорижий валютадаги захира активлар октябрда 921 млн долларга (15,5 фоизга) қисқариб, 5,01 млрд долларни ташкил этди. Бу кўрсаткич бир йил олдин 10,91 млрд доллар эди.
Ўтган йилнинг шу даврига нисбатан жами захиралар 4,29 млрд долларга (7,2 фоизга) кўп. Йил бошидан буён эса улар 2,69 млрд долларга камайган: 1 январда захиралар 66,31 млрд долларни ташкил этганди. Захиралар йил давомидаги энг юқори даражага 1 март ҳолатига кўра етган, ўшанда улар 77,09 млрд доллар бўлган.
