Ўзбекистон Марказий банки валюта интервенциялари стратегиясини тайёрлашни якунламоқда ва валюта бозоридаги сиёсатининг шаффофлигини ошириш мақсадида уни эълон қилишни режалаштирмоқда. Бу ҳақда Марказий банк раиси Тимур Ишметов 24 август куни Тошкентда бўлиб ўтаётган Silk Road Finance & Technology Forum’да маълум қилди.
Унинг сўзларига кўра, регулятор валюта савдоларида иштирок этиш сабабларини бозорга батафсилроқ тушунтиришни истайди.
«Аввал айтганимдек, биз сузувчи валюта курсига ўтдик. Бироқ Марказий банкнинг валюта бозоридаги иштироки бўйича кўплаб саволлар туғилмоқда. Чунки биз олтиннинг йирик харидоримиз ва шу сабабли бозорда катта ҳажмда хорижий валютани сотамиз. Бу миллий валютадаги ортиқча ликвидликни сўриб олишимиз зарурлиги билан боғлиқ», — деди Тимур Ишметов.
Марказий банк раҳбари валюта интервенциялари стратегияси ҳозирда тайёрлашнинг якуний босқичида эканини маълум қилди.
«Биз стратегиямизни тайёрлашни якунлаяпмиз ва уни яқин орада эълон қиламиз. Бу орқали бозорга интервенциялар курсни ушлаб туриш мақсадида эмас, балки олтин сотиб олиш операциялари билан боғлиқ ҳолда амалга оширилаётганини кўрсатмоқчимиз», — деди у.
Тимур Ишметовнинг сўзларига кўра, Марказий банк умуман ўз фаолияти ва бозор билан мулоқотининг шаффофлигини оширишни режалаштирмоқда.
У июль ойида Халқаро валюта жамғармаси Марказий банклар шаффофлиги кодекси (Central Bank Transparency Code) доирасида Ўзбекистон Марказий банки фаолиятини баҳолашни якунлаганини эслатди. Ушбу баҳолаш натижаларини эълон қилиш режалаштирилмоқда.
«Биз ушбу техник ёрдамни ўзимиз сўрадик, бу орқали қайси босқичда эканимизни аниқлаш ва мулоқотимизни қандай яхшилашимиз мумкинлигини баҳолашни истадик. Чунки биз эълон қилинган ислоҳотларни амалга оширишга тўлиқ содиқмиз ва яширадиган нарсамиз йўқ. Биз шаффофликни ошириб борамиз», — деди Марказий банк раҳбари.
Тимур Ишметов, шунингдек, Марказий банк капитал ҳаракати ҳисобини янада либераллаштиришнинг кейинги босқичлари кетма-кетлигини эълон қилишини маълум қилди.
«Капитал ҳаракати ҳисобини либераллаштириш бўйича кўплаб саволлар бор. Биз ушбу ислоҳотларни амалга ошириш кетма-кетлигини белгилашни якунлаймиз ва уни ҳам эълон қиламиз. Шу тариқа, биз шаффофликка эътибор қаратиб, ўзимизнинг асосий вазифамизни бажаришда давом этамиз», — деди у.
