Samsung компанияси янги Galaxy S23, Galaxy S23 Plus ва Galaxy S23 Ultra смартфонларини тақдим этди. Компания, шунингдек, учта моделни ўз ичига олган Galaxy Book ноутбукларининг янгиланган линейкасини ҳам намойиш этди.
Galaxy S23 ва S23 Plus
Иккала моделда ҳам Snapdragon 8 Gen 2 процессорлари (АҚШ бозорида), 120 Гц янгиланиш тезлигига эга 1080р OLED-дисплейлар ва Gorilla Glass Victus 2 мавжуд.
Шунингдек, иккала смартфон ҳам 50 мегапикселли асосий камера, 12 мегапикселли кенг бурчакли ва 10 мегапикселли уч карра масштабли телефото линзаларига эга. Олд камера энди 12 мегапикселли автофокусга эга бўлиб, HDR-видеони сониясига 60 кадр тезликда суратга олиш имкони мавжуд.
Galaxy S23 экранининг ўлчами 6,1 дюйм, Galaxy S23 Plus эса 6,6 дюйм. Биринчисида 3900 мА/соат, иккинчисида 4700 мА/соат қувватга эга аккумулятор мавжуд. Иккала қурилманинг аккумулятор сиғими аввалги авлод — Galaxy S22 билан солиштирганда 200 мА/соатга ошган.
Қурилмалар тўртта рангда мавжуд: лаванда, яшил, қаймоқ ранг ва қора. Galaxy S23 799 доллардан, Galaxy S23 Plus эса 999 доллардан сотувга чиқади.
Galaxy S23 Ultra
Қурилма дизайнида кичик ўзгаришлар бор. Телефоннинг узун қирралари, шунингдек, орқа панель ва экраннинг четлари камроқ қайрилган.
Galaxy S23 Ultra Snapdragon 8 Gen 2 процессори (АҚШ моделлари учун), 8 ёки 16 Гб тезкор хотира ва янгиланган 200 мегапикселли асосий камера билан жиҳозланган. Смартфон 5G ва Wi-Fi 6Е тармоқларини қўллаб-қувватлайди.
Кенг бурчакли камера ва телеобъектив линзалари ўзгаришсиз қолган — мос равишда 12 мегапиксель ва 10 мегапиксель.
Экран ҳам ўзгармаган — бу 6,8 дюймли OLED-дисплей бўлиб, максимал янгиланиш тезлиги 120 Гц ва рухсати 1440р.
Galaxy S23 Ultra ҳам тўрт рангда мавжуд: лаванда, яшил, қаймоқ ранг ва қора. S Pen стилус билан бирга келади. Унинг нархи 1200 доллардан бошланади.
Galaxy Book 3
Galaxy Book Pro 13-авлод Intel Core i7 процессори, 32 Гб тезкор хотира, Intel Iris Xe видеокарта ва 1 ТБ сиғимли SSD’га эга. Ноутбук иккита ўлчамда мавжуд — 14 ва 16 дюйм. Динамик AMOLED экрани 2880х1800 гача бўлган ўлчамларни қўллаб-қувватлайди.
Ноутбук икки рангда — қора ва оч кумуш рангда мавжуд. Қурилманинг нархи 1499 доллардан бошланади.
Galaxy Book Pro 360 асосий Proо модели билан бир хил хусусиятларга эга. Шу билан бирга, унинг экрани тескари томонга букланиб, планшет сифатида ишлатиш мумкин. Шунингдек, у S Pen стилусини ҳам қўллаб-қувватлайди.
Ноутбукнинг нархи 1399 доллардан бошланади. Буюртма учун иккита ранг мавжуд — қора ва оч кумуш.
Galaxy Book Ultra 13-авлод Intel Core i7 процессори, 32 Гб тезкор хотира, Nvidia RTX 4050 ёки RTX 4070 видео картаси, 1 Тб SSD билан жиҳозланган. Қурилма икки ўлчамда — 14 ва 16 дюймда ишлаб чиқарилади ва 2880х1800 ўлчамли динамик AMOLED экранга эга.
Galaxy Book Ultra 2199 доллардан бошланади.
