Ташқи меҳнат миграцияси агентлиги Россияда 2022 йил 14 июлдан кучга кирган, ўзбекистонлик меҳнат мигрантлари учун ҳам таалуқли бўлган қонун ҳужжатлари бўйича маълумот берди.
Кучга кирган мазкур ҳужжатлар бўйича патентга эга ёки Россияда таълим олаётган чет эл фуқароси вояга етмаган фарзандларининг вақтинча бўлиш муддатини узайтириши мумкин. «Визасиз» мамлакатлар фуқаролари (шу жумладан, Ўзбекистон фуқаролари ҳам) Россиядан чиқмасдан меҳнат фаолиятини амалга ошириш (иш) учун миграция картасидаги ташриф мақсадини ўзгартириши мумкин.
Бунинг учун ИИВ Миграция бошқармасига билдиришнома билан мурожаат қилиш керак. Ташриф мақсадини патентга ариза беришда дарҳол «иш»га ўзгартириш мумкин. Агар чет эл фуқароси СТИР (ИНН)га эга бўлса ва уни аризада кўрсатган бўлса, патент олиш учун аризани кўриб чиқиш муддати 5 иш кунидан ошмайди. СТИР (ИНН) бўлмаса, бу муддат 10 иш кунини ташкил қилади.
Бундан ташқари, Россияга меҳнат фаолиятини амалга ошириш учун келган чет эл фуқаролари йилига бир марта тиббий кўрикдан ўтиши керак. Касбий таълим муассасаларида таҳсил олаётган чет эл фуқаролари ишлаши мумкин бўлади. Вақтинча яшаш учун рухсатнома (РВП) ёки яшаш гувоҳномаси (ВНЖ) бекор қилинган тақдирда, чет эл фуқароси 15 кун ичида Россия ҳудудидан чиқиб кетиши керак бўлади.
Қайд этилишича, бу ўзгаришлар 2022 йил 14 июлдан кучга кирган.
Аввалроқ Россиянинг Тюмень вилоятида мигрантларга таксичилик қилиш тақиқланганди. Тегишли ҳужжат ҳуқуқий ахборотнинг расмий интернет порталида эълон қилинган. Унга кўра, транспорт хизматини кўрсатувчи компаниялар янги йил бошидан патент асосида Россия ҳудудида ишлаётган меҳнат муҳожирларини ишга олмайди.
