Президент Жо Байден томонидан белгиланган олти ойлик муддат тугаганидан сўнг АҚШ стратегик захирадаги нефтни сотишни тўхтатади. Бу ҳақда Оқ уйнинг Миллий иқтисодий кенгаши раҳбари Брайан Диз хабар берди.
Қўшма Штатлар октябрь ойигача ҳар куни бозорга бир миллион баррель нефть чиқаради. Оқ уйда бўлиб ўтган брифинг давомида Дизга АҚШ стратегик нефть захирасини бозорга чиқаришни давом эттиришни режалаштираётгани ёки йўқлиги ҳақида савол берилган.
«Ҳозирча бизнинг буни давом эттириш ниятимиз йўқ. Бизга хусусий сектор ишлаб чиқаришни таъминлай олиши керак. Мавжуд ресурсимиз муҳим роль ўйнади, лекин бу доимий ечим сифатида мўлжалланмаган», — дея жавоб берган Брайан Диз.
Унинг аниқлик киритишича, захира нефтини бозорга чиқариш қарори вақтинчалик қабул қилган. Дизнинг қўшимча қилишича, АҚШ маъмурияти 2022 йил бошида бозор иштирокчиларини ишлаб чиқариш ҳажмини оширишга чақирган.
«Биз бир қатор саноат вакилларидан октябргача улар ишлаб чиқаришни кунига тахминан бир миллион баррелга оширишлари мумкинлигини эшитдик», — дея айтган Миллий иқтисодий кенгаши раҳбари.
АҚШ президенти Жо Байден 31 март куни олти ой давомида стратегик нефть захирасининг катта қисмини бозорга чиқариш ниятида эканлигини маълум қилди. Вашингтон томонидан кўрилган чоралар захира ҳажмининг учдан бирга қисқаришига ва 1983 йилги даражага қайтишига олиб келиши мумкин.
АҚШдан кейин ўттиздан ортиқ давлат ҳам худди шундай қадам ташлашга қарор қилди.
Аввалроқ АҚШ май-июль ойларида стратегик захирадан қанча нефть чиқариши маълум бўлган эди. Маълум қилинишича, 20 миллион баррель май ойида чиқарилиши режалаштирилган. Шунингдек, 70 миллион баррель майдан июлгача сотилади.
Саудия Арабистони Байден ташрифидан кейин нефть бозорида мувозанатни сақлашга ваъда берди.
«Томонлар, айниқса, Украинадаги инқироз ва унинг оқибатларини ҳисобга олган ҳолда стратегик иқтисодий ва сармоявий ҳамкорлик муҳимлигини таъкидлади ҳамда барқарор глобал энергия бозорига содиқликларини яна бир бор тасдиқлади. Қўшма Штатлар Саудия Арабистонининг барқарор иқтисодий ўсиш учун жаҳон нефть бозоридаги мувозанатни сақлаш мажбуриятини олқишлади», — дейилади икки давлат қўшма баёнотида.
