Google компания томонидан яратилган сунъий интеллектда онгни кашф этганини айтган Блейк Лемойнни ишдан бўшатди. Бу ҳақда муҳандисга таяниб, Big Technology хабар берди.
Ушбу маълумотни Google расмий вакили Брайан Гэбриел ҳам тасдиқлаган.
The Verge нашрига юборган электрон хатида у компания «Блейкга энг яхши тилакларини» тилашини ёзган. Гэбриелнинг таъкидлашича, Google Лемойн ҳисоботини кўриб чиққан, аммо сунъий интеллектда онг мавжудлигини тасдиқловчи далил топмаган.
Лемойн июнь ойининг ўрталарида LaMDA (Language Model for Dialogue Applications) нейрон тармоғи ўз онги ва ўзини шахс сифатида идрок этиш белгиларини кўрсатганини айтди. Муҳандис чат-ботлар яратувчи сунъий интеллект ўзининг ҳуқуқлари ҳақида гапира бошлаганига эътибор қаратди.
Лемойн раҳбариятга батафсил ҳисобот ёзди, аммо охир-оқибат пул тўланувчи маъмурий таътилга юборилди.
Орадан бир ҳафта ўтгач, Google муҳандиси нейротармоқ учун адвокат ёллаганини эълон қилди.
Аввалроқ Google рецессия хавфи туфайли янги ходимларни ишга олишни камайтиришини маълум қилган эди. Google раҳбари ходимларни компаниянинг «қуёшли кунлари»дагига қараганда тезроқ ва кўпроқ ишлашга чақирганди.
Олдинроқ эса Apple нейрон тармоқлар ёрдамида мусиқа ишлаб чиқарувчи AI Music стартапини сотиб олгани ҳақида хабар берилган эди. Ўшанда компания вакили келишув бўйича изоҳ беришдан бош тортганди.
