АҚШ молия вазири Жанет Йеллен мамлакат иқтисодиётида пасайиш кузатилаётганини маълум қилди. Бу ҳақда NBC хабар бермоқда.
Унинг сўзларига кўра, бу таназзулдан далолат эмас, балки иқтисодиётнинг тез ўсиши билан боғлиқ заруратдир.
«Иқтисодиёт секинлашмоқда: 2021 йили у жуда тез ўсди — 5,5 фоизга. Бу пандемия туфайли ишини йўқотган одамларнинг иш жойига қайтишига олиб келди. Бу рецессия давридаги иқтисодиёт эмас. Биз ўсиш секинлашган ўзгаришлар давридамиз. Бу зарур ва вазиятга мос келади», — дейди у NBC’га берган интервьюсида.
Йеллен, шунингдек, АҚШда инфляция «жуда юқори» эканини таъкидлади.
Маълумот учун, АҚШ Федерал захира хизмати 2022 йил бошидан бери асосий ставкани уч марта оширди. Охирги марта ставка 15 июнь куни 0,75 фоиз пунктга, 1,5-1,75 фоиз оралиғига кўтарилган эди.
Рецессия хавфи
Иқтисодчилар АҚШда кейинги ўн икки ой ичида рецессия эҳтимолини қирқ тўрт фоизга баҳоламоқда.
«Одатда, бундай кўрсаткич фақатгина ҳақиқий рецессия олдидан ёки у юз берган вақтда кузатилади», дея таъкидлаган The Wall Street Journal.
Рецессия хавфи АҚШ Федерал захира тизими июнь ойида доллар курсни 1990 йиллар ўрталаридан бери рекорд даражага кўтаргани сабаб ортиб бормоқда. Халқаро валюта жамғармаси АҚШ иқтисодиёти пандемия туфайли юзага келган зарбани тезда енгиб ўтганини қайд этган эди.
Бироқ захираларнинг тугаши билан боғлиқ бўлган талабнинг тез тикланиши, шунингдек, энергия нархларининг кўтарилиши ва етказиб бериш занжиридаги узилишлар инфляциянинг сезиларли даражада ошишига олиб келди.
Халқаро валюта жамғармасининг таъкидлашича, ҳозирги шароитда рецессия хавфи билан курашиш янада қийинлашган.
Аввалроқ Илон Маск АҚШни рецессия хавфидан огоҳлантирганди.
Шунингдек, Google юз бериши мумкин бўлган иқтисодий рецессия (иқтисодий ўсишнинг секинлашиши, пасайиши) сабаб 2022 йил охиригача янги ходимларни ишга ёллашни камайтирмоқчи.
