Германиянинг ташкилотлар учун дастурий таъминот ишлаб чиқарувчи, ушбу соҳада жаҳон етакчиларидан бири бўлган SAP компанияси ўз ҳисоботида Россия ва Беларусни тарк этиш қарорининг компания бизнесига салбий таъсирини 350 миллион еврога баҳолади. Бу ҳақда РБК нашри хабар берди.
Ушбу миқдор таркибига йўқолган фойда, қайта қуриш харажатлари ва қарзлардан воз кечиш киради. 2022 йилнинг иккинчи чорагида SAP’нинг операцион фойдаси 1,68 миллиард еврони ташкил этган бўлса, 2021 йилнинг шу даврида бу кўрсаткич 1,92 миллиард еврога тенг бўлган. Халқаро молиявий ҳисобот стандартлари бўйича компаниянинг операцион фойдаси 32 фоизга камайди.
Россия ва Беларусни тарк этишнинг кутилаётган оқибатлари муносабати билан SAP 2022 йил учун операцион фойда прогнозини 7,6–7,9 миллиард еврогача пасайтирди (олдинги прогноз 7,8–8,25 миллиард евро эди). SAP молия директори Лука Мучич ҳисоботни шарҳлар экан, компаниянинг Россия ва Беларусь бозорларидан чиқиши 2022 йил охиригача якунланиши кераклигини ва компания келажакда янги салбий воқеаларни кутмаслигини айтди.
Бироқ йилнинг учинчи ярмидаги операцион фойданинг камайишига Украинадаги ҳарбий ҳаракатлар ва уларнинг оқибатлари асосий сабаб бўлди.
Маълумот ўрнида, SAP — бизнес учун иловалар ишлаб чиқариш бўйича дунёдаги энг йирик компания ҳисобланади. Россияда SAP корпоратив ресурсларни бошқариш (ERP), мижозлар билан муносабатларни бошқариш (CRM), таъминот занжири бошқаруви (SCM), ишлаб чиқаришни бошқариш (ERP ишлаб чиқаришни режалаштириш, MES, EAM, CAD) каби тизимларини сотган. Унинг мижозлари орасида «Сбербанк», «Газпром» ва бошқа компаниялар, шу жумладан кичик ва ўрта бизнес вакиллари ҳам бор эди.
SAP 2022 йил март ойи бошида Россияда маҳсулот ва хизматлар сотишни тўхтатганини эълон қилди.
Компанияга яқин манбанинг РБК нашрига айтишича, ишлаб чиқарувчи ЕИ ва АҚШ санкцияларига тушмаган мижозларни қўллаб-қувватлашда давом этган. Улар орасида касалхоналар, фуқаролик инфратузилмаси ва озиқ-овқат таъминоти ташкилотчилари мавжуд эди.
Бироқ 25 март куни SAP Россияда ўзининг булутли хизматларини тўхтатганини эълон қилди. Апрель ойида эса санкциялар таъсирига тушмаган мижозлар билан ишлашни ҳам рад қилганини таъкидлади ва Россия бозорини тарк этишини маълум қилди. Компания Украинадан келган қочқинларни қўллаб-қувватлаш учун 700 минг евро хайрия қилган.
Аввалроқ ахборот технологиялари ва коммуникацияларини ривожлантириш вазири Шерзод Шерматов SAP компанияси вакиллари билан учрашган ва уларга Ўзбекистонда компаниянинг минтақавий офисини очишни таклиф қилганди.
Шундан сўнг Ўзбекистонда SAP’нинг минтақавий ваколатхонаси очилиши маълум қилинганди. Ўшанда Ўзбекистон томони SAP ваколатхонаси Ўзбекистонда IT соҳасини сезиларли даражада ривожлантириши, шунингдек, йирик технологик компанияларнинг Ўзбекистон бозорига кириши учун туртки бўлишини таъкидлаганди.
