Буюк Британия ҳукумати аввалроқ эълон қилинган Россия нефти, кўмири ва олтинига қарши санкциялар тафсилотларини эълон қилди. Бу ҳақдаги хабар мамлакат ҳукумати сайтида чоп этилди.
Буюк Британия 21 июлдан бошлаб Россиядан олтин импорт қилишни тақиқлади.
Лондон Россия нефти ва кўмирига нисбатан илгари эълон қилинган санкциялар тафсилотларини ҳам эълон қилди: қироллик йил охиригача Россиядан нефть ва нефть маҳсулотларини, август ойида эса кўмир сотиб олишни тўхтатади.
«Ушбу ўзгартириш (Россиядан) нефть ва нефть маҳсулотлари, кўмир ва кўмир маҳсулотлари ҳамда олтинни олиб киришни, шунингдек, ушбу товарларни бевосита ёки билвосита сотиб олиш, етказиб беришни тақиқлайди. Шунингдек, ушбу товарлар билан боғлиқ техник ёрдам, молиявий хизматлар, молиялаштириш ва брокерлик хизматларини кўрсатишни ман этади», — дейилади ҳукумат хабарида.
Хабарда олтин импортига тақиқ 21 июль, пайшанба кунидан кучга кириши қайд этилган. Россия кўмирига қарши эмбарго 2022 йил 10 августдан, нефть импортига тақиқ эса 2022 йил 31 декабрдан бошлаб амал қилади.
Буюк Британия 2022 йил 6 апрель куни йил охиригача Россия кўмири ва нефти импортини бутунлай тўхтатиши ва шундан сўнг «газ импортини ҳам имкон қадар тезроқ тугатиши»ни эълон қилган эди.
Лондон, шунингдек, «Сбер», Москва кредит банки ва бир нечта россиялик ишбилармонлар, жумладан Леонид Михельсон («Новатэк»), Сергей Иванов («Алроса») ва катта Андрея Гурьев («Фосагро») активлари музлатилганини эълон қилди.
Аввалроқ Еврокомиссия Россия олтинини олиб киришга тақиқ жорий этишни таклиф қилганди. 18 июль куни Европа Иттифоқи давлатлари шу ва бошқа қатор чора-тадбирлар бўйича келишиб олди, деган эди Венгрия ташқи ишлар вазири Петер Сийярто.
Шу билан бирга, чекловлар Россиянинг энергия ресурслари ва қишлоқ хўжалиги маҳсулотларига таъсир қилмаслиги ҳам маьлум қилинган.
Европа Иттифоқи апрель ойи бошида Россия кўмирига эмбарго жорий қилганди.
АҚШ Россиянинг Украинага босқини бошланганидан бир неча кун ўтибоқ, Россиядан нефть ва газ етказиб беришга эмбарго жорий этган.
Буюк Британия аввалроқ Россиядан пўлат ва темир импортига тақиқ жорий қилган ва Россия банклари ва бизнесменларига қарши санкциялар киритганди.
