Япония экспорти 2022 йил июнь ойида 2021 йилнинг июнь ойига нисбатан 19,4 фоизга ўсиб, 8,628 триллион иенани (62,4 миллиард доллар) ташкил этди. Бу ҳақда мамлакат молия вазирлиги хабар берди.
Экспортнинг ўсиши кетма-кет 16 ойдан бери кузатилмоқда. Trading Economics билан суҳбатлашган экспертлар экспорт ҳажми июнь ойида ўртача ҳисобда 17,5 фоизга ўсишини тахмин қилганди.
Саноат ускуналари экспорти 14,3 фоиз, транспорт воситалари 3,4 фоиз, шу жумладан енгил автомобиллар экспорти 0,4 фоизга ўсди. Чет элга темир ва пўлат етказиб бериш ҳажми 44,2 фоизга, кимё маҳсулотлари эса 19,6 фоизга ошди.
Давлатлар кесимида Хитойга экспорт 8,3 фоиз, АҚШга 15,7 фоиз, Гонконгга 14,3 фоиз, Жанубий Кореяга 27,1 фоизга кўпайди.
Импорт ҳажми эса 1,46 бараварга (46,1 фоиз) ўсиб, 10,012 триллион иенани ташкил қилди. Таҳлилчилар, май ойидаги 48,9 фоизлик сакрашдан кейин ўртача 45,7 фоизлик ўсишини башорат қилган эди.
Импорт
Япония импорти кетма-кет 15 ойдан буён икки хонали сон фоизида ўсиб келмоқда. Июнь ойида минерал ёқилғи импорти 2,4 баробар, хусусан, бензин 2,5 баравар, кўмир 6,9 фоизга ошди. Кимёвий маҳсулотларни харид қилиш 33,7 фоизга, транспорт воситаларини сотиб олиш эса 5,2 фоизга кўпайди.
Хитойдан импорт ҳажми 33,3 фоиз, АҚШдан 25,2 фоиз, Гонконгдан 20,9 фоиз, Жанубий Кореядан эса 15,8 фоизга ортди. Япониянинг экспорти 2022 йил январдан июнгача бўлган даврда 2021 йилнинг шу даврига нисбатан 15,2 фоизга, импорти эса 24,6 фоизга ошди.
Япониянинг ташқи савдо тақчиллиги июнь ойида 1,384 триллион иенага етди, 2021 йил бу кўрсаткич 2,386 триллион иенани ташкил қилган ва 369,4 миллиард иена профицит(ижобий сальдо, бюджет даромадларининг унинг харажатларидан ошиб кетиши) қайд этилган эди.
Шундай қилиб, 2022 йил биринчи ярим йиллиги якунларига кўра, Япония дефицити (бюджет харажатларининг унинг даромадларидан ошиб кетиши) 7,924 триллионни ташкил қилди.
