Дунёдаги энг машҳур рақамли видео ўйинлар дўкони Steam Tesla автомобилларига бирлаштирилади. Бу ҳақда Tesla бош директор Илон Маск Twitter’да ёзди.
Tesla ўзининг Tesla Арcаде ўйин кутубхонасига эга бўлиб, унда йигирмага яқин ўйинлар мавжуд. Улар орасида 1980-90-йиллардаги Stardew Valley ва Sonic the Hedgehog ўйинлари ҳам бор. Демо версия август ойидан чиқарилиши мумкин.
Илон Маск платформага замонавийроқ ўйинлар қўшилиши ҳақида биринчи марта эълон қилаётгани йўқ. 2021 йил июнь ойида Tesla бош директори Cyberpunk 2077 ўйинини машинада қандай ўйнашини кўрсатди, аммо ҳозирча Tesla кутубхонасида жиддий график куч талаб қиладиган ўйинлар йўқ.
Tesla Steam билан бирлашув орқали ўйин коллекциясини анча кенгайтириши мумкин. Steam компьютер ўйинлари тарқатувчи дунёдаги энг йирик рақамли дўкон ҳисобланади.
ArsTechnica маълумотларига кўра, платформанинг бозор улуши етмиш беш фоиз ва товар айланмаси эса ўттиз миллиард долларни ташкил қилади.
Маск 2021 йил февраль ойида Tesla’нинг узоқ муддатли мақсади алоҳида ўйинларни жойлаштиришдан кўра, хизматни тўлиқ интеграция қилиш эканини айтганди.
Tesla 2021 йилнинг ёзида автомобиль ҳаракатланаётганда ўйнаш имконини берувчи Passenger Play янгиланишини амалга оширди. Ушбу функция шу йилнинг 24 декабрида, АҚШ Миллий Йўл ҳаракати хавфсизлиги бошқармаси компанияга нисбатан текширув бошлаганидан кейин тўхтатиб қўйилган эди.
Июнь ойи ўрталарида Хитойнинг қўшимча реаллик кўзойнаклари ишлаб чиқарувчиси Nreal Steam компьютер ўйинлари хизмати билан интеграциялашувини эълон қилди. Бета-версияда фойдаланувчилар компьютер ўйинларини кенгайтирилган реалликда кўриши мумкин бўлади. Nreal’нинг таъкидлашича, бу 200 дюймли экранда ўйинни томоша қилиш билан тенг.
