NASA «Жеймс Уэбб» космик телескопидан олинган биринчи тўлиқ тасвирни эълон қилди. Бу ҳақда Аэрокосмик агентлик веб-сайтида хабар берилди.
Бу Ердан узоқда бўлган галактикаларнинг энг тиниқ тасвири бўлиб, инсоният ҳали коинотга бу қадар чуқур назар ташлай олмаганди.
Расмда SMACS 0723 кластери кўрсатилган. Суратда осмоннинг минглаб галактикаларга тўғри келувчи қум донасидек қисми тасвирга олинган.
Сурат турли узунликдаги тўлқинлардан олинган бир нечта тасвирлардан иборат. Ушбу фото учун экспозиция вақти ўн икки ярим соатни ташкил қилди.
«Фотосуратда галактикалар тўрт ярим миллиард йил аввалги ҳолатидагидек тасвирланган. Галактикалар кластерининг умумий массаси тортишиш линзалари каби ҳаракат қилиб, уларнинг орқасидаги узоқроқ галактикаларни янада катталаштиради», дея маълум қилди NASA.
Аэрокосмик агентликнинг таъкидлашича, «Жеймс Уэбб» қурилмалари уларни аниқ фокусда суратга олишга муваффақ бўлган, бу энг кичик деталларни ҳам кўриш имконини беради.
«‘Орқа фон’даги камида битта унча катта бўлмаган ёруғлик нуқтасининг ёши ўн уч миллиарддан ошади», — дейди NASA раҳбари Билль Нелсон.
Маълумот учун, катта портлашдан сўнг ҳисобланадиган бутун коинотнинг ёши тахминан 13,8 миллиард йил деб баҳоланади.
NASA «Жеймс Уэбб»ни 2021 йил декабрь ойида коинотга учирди. Телескопни тайёрлаш деярли тўққиз миллиард долларга тушди. У Ердан бир миллион миль (биру олти миллион километр, Ойдан Ергача бўлган масафодан тўрт баравар узоқроқ) узоқликда жойлашган.
«Жеймс Уэбб» тўртта илғор илмий асбоблар, жумладан, «мисли кўрилмаган» қобилиятга эга юқори сезгир инфрақизил детекторлар билан жиҳозланган. NASA телескопни 1990 йилда коинотга учирилган «Хаббл» телескопининг вориси деб атади.
Reuters нашри хабарига кўра, янги телескоп «Хаббл»га қараганда юз баравар сезгирроқ. «Жеймс Уэбб»нинг ишга туширилиши техник муаммолар ва бошқа қийинчиликлар туфайли бир неча бор қолдирилди, бу эса лойиҳа нархининг доимий ўсишига олиб келди.
