«Bugun.uz» мухбири Ўзбекистон Туризм ва маданий мерос вазирлиги ҳамда Озарбайжон Давлат туризм агентлиги ҳамкорлигида ташкил этилган пресс-тур доирасида Гиннеснинг рекордлар китобига киритилган учта ажойиб музейга ташриф буюрди. Ушбу музейлар уларни зерикарли деб биладиганларнинг одатий қарашларни ўзгартириб юбора олади.
Танкерлар музейи
Биринчи ва ягона «Сурахани» танкер-музейи 1957 йилдан буён Каспий денгизи соҳилида, Биби-Эйбат қишлоғида жойлашган. Кема 1980 йилларгача нефтни қайта ишлаш заводи сифатида ишлаган, кейинчалик тозаловчи станция, шундан сўнг музейга айланган. У 2021 йилда очилган. Уни яратишда Англия, Норвегия, Россия ва Туркиядан мутахассислар иштирок этган.
Ташқи томондан кема кичикроқ бўлиб, унчалик эътибор тортмайди, аммо ичкарида сизни қизиқарли манзара кутади. Музей жами 11 та хонадан иборат. Уларнинг ҳар бирида интерфаол доскалар, экранлар ва ўқув симулятори мавжуд. Бу ерда, шунингдек, 360 даражали экран, навигация ва алоқа хонаси, ресторан, Морзе телеграф аппарати ва бошқалар ҳам бор. Экспонатлар бутун дунёдан тўпланган бўлиб, уларнинг сони 3 мингдан ортиқ. Шундай ноёб экспонатлардан бири ХVIII асрга тегишли Девис квадрантидир.
Музей директори Турал Ибрагимовнинг айтишича, бинонинг 90 фоизи қайта тикланган. Унга йил давомида 54 минг киши ташриф буюрган.
Миниатюра музейи
Эски шаҳарда (Ичери-шеҳер) ноёб миниатюра музейи мавжуд бўлиб, унда бутун дунё китоблари кичик форматларда тақдим этилади. Энг кичик китобнинг ҳажми 0,75 миллиметрни ташкил қилади. Музей тўпланган китобларнинг кўплиги билан Гиннеснинг рекордлар китобига кирган. Ўшанда унда 2,3 мингдан ортиқ китоб бўлган. Бугунги кунда музейда дунёнинг 83 давлатидан, жумладан, Ўзбекистондан 6 мингга яқин экспонат мавжуд.
Бу ерда ўзбек китобларидан «Мустақиллик асослари», «Ўзбекистон», Зулфиянинг «Фақат севги ила» ва бошқалар тақдим этилган.
Ретро автомобиллар музейи
2012 йилда қурилган Ҳайдар Алиев марказининг тўртинчи қаватида ретромобиллар музейи жойлашган. Бу ерда «Porsche»дан «Mercedes-Benz»гача бўлган жаҳон ишлаб чиқарувчиларининг турли даврлардаги автомобилларини кўриш мумкин. Барча экспонатлар Озарбайжон автомобиль федерациясига тегишли бўлиб, автомобиллар сони 85 тани ташкил қилади.
