Germaniya mudofaa vazirligi Amerikaning Boeing kompaniyasidan 60 ta Chinook CH-47F ogʻir transport vertolyotini xarid qilmoqchi, deya xabar bermoqda Bild am Sonntag. Ularning narxi taxminan 5 milliard yevro boʻlishi mumkin.
Yetkazib berish ishlari 2025–2026 yillarda amalga oshirilishi rejalashtirilgan. Taxminlarga koʻra, vertolyotlar AQSHning Sikorsky kompaniyasi va Germaniyaning VFW kompaniyasi tomonidan birgalikda ishlab chiqarilgan, eskirgan CH-53G Stallion rotorining oʻrnini bosadi.
Nashrning yozishicha, bu texnikalar allaqachon 50 yoshda boʻlib, ularni taʼmirlash zarur. Mudofaa vaziri Kristin Lambrext Bundestagni bu qaror haqida kelasi hafta xabardor qiladi.
Avvalroq Bundesver bosh inspektori Eberxard Zorn Germaniya Rossiyaning “Iskander” raketa tizimlarining zarbalari tahdididan himoyalanish uchun AQSH yoki Isroildan raketaga qarshi mudofaa tizimlarini sotib olish imkoniyatini koʻrib chiqayotganini maʼlum qilgandi.
Zornning tushuntirishicha, Kaliningradda joylashgan “Iskander”lar deyarli barcha Gʻarbiy Yevropa hududiga yetib borishi mumkin va Germaniyada bunday zarbadan “ishonchli qalqon” yoʻq edi.
Avvalroq Amerikaning Lockheed Martin kompaniyasiga tegishli boʻlgan UH-60A Black Hawk Sikorsky harbiy transport vertolyoti birinchi marta uchuvchisiz rejimda parvoz qilgani haqida xabar berilgandi.
Shuningdek, Google Maps xizmati Rossiyadagi harbiy va strategik obyektlardan maxfiylik muhrini olib tashlagani maʼlum qilindi.
