Tesla 2023 йилнинг бошиданоқ Optimus гуманоид роботини ишлаб чиқаришни бошлаши мумкин. Бу ҳақда CNBC бош директор Илон Маскнинг сўзларига таяниб ёзмоқда.
Компания роботнинг ишлайдиган прототипини чиқармаган ва уни ишлаб чиқиш қанчалик қийинлиги ҳозирча аниқ эмас.
«Бизда Optimus’нинг биринчи версиясини келгуси йил ишлаб чиқаришга қўйиш имконияти бор», — деди Маск Техаснинг Остин шаҳридаги Tesla заводининг очилишида.
Тадбиркорнинг айтишича, бунинг натижасида робот одамлар қилишни истамаган ҳамма нарсани қила олади ва бу, унинг фикрича, «мўл-кўлчилик даври» бошланишига олиб келади.
Маск, шунингдек, робот Tesla электромобилларига қараганда «дунёни янада каттароқ даражада ўзгартириши»ни айтди. «Балки ҳали ишониш қийин», дея қўшимча қилди у.
AI тадқиқотчиси ва тадбиркор Гари Маркуснинг фикрича, 2023 йил охиригача ҳеч бир робот инсоннинг барча вазифаларини бажара олмайди.
«Tesla (кўп йиллик саъй-ҳаракатлардан кейин) битта нисбатан оддий вазифани (автомобиль ҳайдаш) ишончли ҳал қилишга ҳам яқинлашмади. Ҳеч қачон оммага кўрсатилмаган робот яқин бир-икки йил ичида инсониятнинг барча муаммоларини ҳал қилади, деб даъво қилиш шунчаки бемаъниликдир», — дея унинг сўзларини келтиради нашр.
Маск 2022 йил январь ойи охирида Optimus гуманоид роботи Tesla 2022 йилда ишлаб чиқаётган энг муҳим технология эканини айтганди. Робот ҳақида биринчи марта 2021 йилда эълон қилинган.
Робот такси
Завод очилишида Маск, шунингдек, Tesla футуристик дизайнга эга бўлган, ўзини ўзи бошқарадиган таксиларни ишлаб чиқишини айтди. Шунингдек, бу йил Tesla Шимолий Америкадаги барча обуначиларга Full Self-Driving бета-дастурини тарқатади.
Маск 2019 йилда 2020 йилгача АҚШнинг баъзи шаҳарларида ҳайдовчисиз робот таксиларни ишга туширишга ваъда берган эди. 2022 йил январь ойида миллиардер агар бу йил унинг компанияси инсондан кўра хавфсизроқ ҳайдаш тизимини ярата олмаса, «ҳайратда қолишини» айтди.
