Американинг Rivian компанияси 2022 йилнинг биринчи чорагида таъминот занжири билан боғлиқ давом этаётган қийинчиликларга қарамай, 2,55 мингта электромобиль ишлаб чиқарди. Бу ҳақда Bloomberg хабар бермоқда.
Маълумотларга кўра, сентябрь ойида ишлаб чиқариш бошланганидан бери Иллинойс штатидаги Rivian заводида жами 3,6 мингга яқин электромобиль ишлаб чиқарилган.
Компания, шунингдек, 2022 йилда 25 мингта автомобиль, шу жумладан унинг асосий акциядори Amazon учун 10 мингта электр фургон ишлаб чиқариш режаларини тасдиқлади.
Март ойининг бошидан бери компания ўзининг R1T пикаплари ва R1S йўлтанламаслари нархини юқори моддий харажатлар ва логистика қийинчиликлари туфайли баъзи маҳсулотлар учун 20 фоизгача оширишга мажбур бўлди.
Қайд этилишича, Иллинойсдаги корхона Rivian’га йилига 150 мингтагача электромобиль ишлаб чиқариш имконини беради, ҳозирда компания учун асосий чеклов — бутловчи қисмларнинг етишмаслиги. Келгусида корхонани кенгайтириш мумкин, бу эса ишлаб чиқариш ҳажмини йилига 200 минг автомобиль ошириш имконини беради.
Бундан ташқари, Жоржия штатида иккинчи Rivian заводи қурилади, бу ҳар йили 400 мингта электромобилни йиғиш имконини беради. Ўн йиллик охирига келиб, компания бозорнинг 10 фоизини назорат қилишни режалаштирмоқда.
Аввалроқ Миллиардер Жорж Сорос Rivian’нинг энг йирик инвесторларидан бирига айлангани хабар қилинганди. Шунингдек, Rivian капиталлашув бўйича Volkswagen’ни ортда қолдиргани ҳақида хабар берилди.
