Shavkat Mirziyoyev iqtisodiy kompleks rahbarlariga makroiqtisodiy barqarorlikni saqlab qolish boʻyicha taʼsirchan choralarni davom ettirishga koʻrsatma berdi.
Taʼkidlanishicha, buning uchun hudud va tarmoq xarajatlarini 10 trillion soʻmga qisqartirish talab etiladi.
Prezident yil yakuniga qadar barcha hokimlik, vazirlik va idoralarga:
- moliyaviy manbasi aniq boʻlmagan qurilishlarni boshlash;
- bino taʼmirlash, avtomobil, mebel, ofis anjomlari xarid qilish kabi qoʻshimcha xarajatlarni amalga oshirishni qatʼiyan taqiqladi.
“Bu – mablagʻlar olib qoʻyiladi, degani emas. Barcha iqtisod qilingan mablagʻlar ushbu hudud va tarmoqning rivojlantirish dasturiga yoʻnaltiriladi”, — dedi Shavkat Mirziyoyev.
Bosh prokuraturaga byudjet tashkilotlarida ushbu xarajatlarning oldini olish ustidan tizimli nazorat oʻrnatish va viloyat kesimida har hafta Prezidentga axborot berish topshirildi.
