OPEK+ energiya narxlarini barqarorlashtirishdek “umumiy manfaat” foydasiga qaror qabul qilishdan siyosatni farqlaydi. Bu haqda Saudiya Arabistoni energetika vaziri Abdulaziz bin Salmon Ol Saud maʼlum qildi.
Butun dunyodagi hukumatlar va xalqaro tashkilotlar Ukrainada urush boshlanganidan keyin Rossiyaga sanksiyalar kiritdi va iqtisodiy aloqalarni uzdi. Biroq OPEK — neft eksport qiluvchi 13 davlatni oʻz ichiga olgan hukumatlararo tashkilot Rossiyaga qarshi chora koʻrishni rejalashtirmayapti. Rossiya tashkilotning kengaytirilgan OPEK+ alyansidagi asosiy hamkori hisoblanadi.
Saudiya Arabistoni energetika vaziri shahzoda Abdulaziz bin Salmon Ol Saudning aytishicha, tashkilotning mavjudligi uning neft narxini barqarorlashtirish missiyasini boshqa geosiyosiy omillardan ajratishga bogʻliq.
Mart oyi boshida Saudiya Arabistoni va BAA Rossiyani Ukrainaga hujumdan voz kechishga va qoʻshinlarini olib chiqib ketishga chaqiruvchi BMT Bosh Assambleyasi rezolyutsiyasini yoqlab ovoz bergan edi. Ol Saud, qirollik Rossiyaning harakatlari haqida oʻz soʻzini aytishi mumkin boʻlgan boshqa forumlar ham borligini aytdi.
“Gap OPEK+ haqida ketar ekan, men buni 35 yildan beri bajarib kelayotganimni aytish sharafiga muyassar boʻldim va qanday qilib siyosiy tafovutlarimizni barchamizning umumiy manfaatimizga xizmat qiladigan narsadan ajratishga muvaffaq boʻlganimizni bilaman. OPEK kengashiga kirganimizda, hamma eshik oldida siyosatni tark etadi”, — dedi Saudiya Arabistoni energetika vaziri Dubaydagi Jahon hukumati sammitida.
Ol Saud OPEK va OPEK+ nizolar yoki tajovuzkor harakatlarga aralashgan turli mamlakatlar, jumladan Iroq va Eron bilan ishlaganini taʼkidladi.
“OPEK+ʻni saqlab qolishimizga sabab shuki, biz bu masalalarni, bu muammolarni siyosatdan qatʼi nazar, umumiy manfaatlarga eʼtibor qaratishimizga yordam beradigan yondashuvdan foydalangan holda muhokama qilmoqdamiz”, — dedi energetika vaziri.
Ol Saudni Birlashgan Arab Amirliklari energetika vaziri Suhayl al-Mazrui qoʻllab-quvvatladi. Uning taʼkidlashicha, tashkilot aʼzolari harbiy toʻqnashuv holatida boʻlgan paytda ham oʻz faoliyatini davom ettirgan, taraf tutmagan. Uning soʻzlariga koʻra, OPEKning yagona vazifasi — bozorni barqarorlashtirish.
Al-Mazruining aytishicha, davlatlar bir tomonlama ravishda Rossiya neftini sotib olishdan bosh tortishi mumkin, ammo tashkilot aʼzosini siqib chiqarish uning ruhiga ziddir.
Avvalroq Qatar energetika vaziri Rossiya gazining oʻrnini bosish imkoni hozircha yoʻqligini maʼlum qilgandi. Shuningdek, Germaniya va Qatar gaz boʻyicha uzoq muddatli hamkorlikka kelishib olgani haqida xabar berildi.
