YouTube рекламали бепул телекўрсатувларни ишга туширади. Бу ҳақда TechCrunch хабар берди.
Маълум қилинишича, АҚШ бозорида Pluto TV, The Roku Channel, Tubi, IMDb TV, Xumo, Plex, ва Peacock каби шунга ўхшаш бизнес моделга эга стриминг хизматлари аллақачон мавжуд.
Америкалик томошабинлар 4 мингта шоу эпизодини, жумладан, «Жаҳаннам ошхонаси» (Hell’s Kitchen), «Андромеда» (Andromeda), «Хартленд» (Heartland) ва бошқаларни томоша қилиши мумкин. Компания ҳар ҳафта ўз коллекциясига 100 та янги программа ва фильмлар қўшишни режалаштирмоқда.
Қайд этилишича, шу тариқа YouTube ўз ўсиш суръатларини оширишга интилмоқда. Kantar маълумотларига кўра, АҚШ уй хўжаликларининг 85 фоизи видео стриминг обунасига эга, бироқ бундай хизматлар чораклик ўсишининг аксарияти рекламали бепул видеолар ҳисобидан келади.
Ҳозирда YouTube’да Warner Bros., Paramount Pictures ва Disney Media & Entertainment Distribution каби компанияларнинг 1500 дан ортиқ фильмлари мавжуд. Март ойда Runaway Bride and Legally Blonde каби фильмлар намойиш этилди.
Nielsen маълумотларига кўра, 2021 йил декабрь ҳолатига АҚШда 135 дан ортиқ фойдаланувчи YouTube’ни телевизорда томоша қилган. Компаниянинг тушунтиришича, реклама миқдори маълум бир программа ва кўрсатув контекстининг томошабинлари сонига боғлиқ бўлади. Кўпгина шоуларни юқори аниқликда — 1080р кўринишида томоша қилиш мумкин бўлади.
Аввалроқ YouTube Россияда монетизацияни вақтинча тўхтатгани хабар қилинганди. Шунингдек, YouTube монетизация учун NFT’дан фойдаланишга рухсат бериши ҳақида хабар берилди.
