Toyota Motor Corp. 16 март куни мамлакат шарқида содир бўлган 7.4 магнитудали зилзила оқибатида юзага келган эҳтиёт қисмлар танқислиги сабабли келгуси ҳафта Япониядаги заводларининг аксариятини бир неча кунга ёпишни режалаштирмоқда. Бу ҳақда The Wall Street Journal хабар берди.
Автомобиль ишлаб чиқарувчиси 18 март куни баъзи етказиб берувчилар зилзиладан таъсирланганини ва етарли миқдордаги қисмларни етказиб бера олмаслигини маълум қилди. Toyota ушбу етказиб берувчиларнинг номларига аниқлик киритмади, аммо йирик чип ишлаб чиқарувчиси Renesas Electronics’нинг зилзила ҳудудидаги заводлари 23 мартгача тўлиқ ишлаб чиқаришга қайтмаслигини алоҳида таъкидлади.
Toyota корхоналарининг ишини тўхтатиб туриш тўғрисидаги қарор баъзи машҳур моделларни, шу жумладан RAV4 йўлтанламасини ишлаб чиқаришга таъсир қилади.
Бундан ташқари, шу ҳафта бошида компания март ойидаги ишлаб чиқариш режаларини 50 мингта автомобилга қисқартирганди. Энди Toyota апрель ойидаги ишлаб чиқариш прогнозини 150 мингта автомобилга туширди ҳамда май ва июнь ойларидаги мақсадларга нисбатан ишлаб чиқаришнинг пасайиши мумкинлигини эълон қилди.
Компания жорий бозор воқеликларига мос равишда ишлаб чиқариш режаларини қайта кўриб чиқишга ҳаракат қилаётганини айтди.
Аввалроқ Чип тақчиллиги туфайли Toyota’нинг чораклик даромади 407 миллион долларга камайгани хабар қилинганди. Шунингдек, Toyota Tacoma пикапининг янги версиясини тақдим этгани ҳақида хабар берилди.
