Россиянинг Ғарб санкцияларига жавоби — иқтисодий йўналишдаги ўзгаришларнинг бошланиши. Бу ҳақда Россия ташқи ишлар вазири Сергей Лавров RT’га берган интервьюсида маълум қилди.
«Санкциялардан омон қоламиз. Президент, ҳукумат томонидан ишлаб чиқилаётган ва аста-секин эълон қилинадиган чора-тадбирлар янги шароитларга мослашиш учун бизнинг иқтисодий йўналишимизни созлашнинг бошланишидир», — деди Лавров.
Вазир, шунингдек, ҳозир содир бўлаётган воқеаларни Қиримнинг аннексияси туфайли Россияга қарши санкциялар жорий қилинган 2014 йилдаги вазият билан таққослаш мумкин эмаслигини таъкидлади. Унинг қўшимча қилишича, энди Россия фақат ўзи ва ёнида турадиган иттифоқчиларга ишониши мумкин.
«Санкциялар ҳар доим бизни фақат мустаҳкамлаб келган», — деди Россия ташқи ишлар вазири.
Аввалроқ Япония, Австралия ва Янги Зеландия Россияга қарши янги санкциялар киритгани хабар қилинганди. Шунингдек, Дмитрий Песков Россиянинг мавжуд қийинчиликлардан ўз манфаати йўлида фойдаланаётганини айтгани ҳақида хабар берилди.
