Россия Президенти матбуот котиби Дмитрий Песков АҚШнинг Ғарб санкциялари Россия иқтисодиётини вайрон қилгани ҳақидаги баёнотларига қўшилмайди. Кремль вакилининг сўзларига кўра, ҳақиқатан ҳам қийинчиликлар мавжуд, лекин «ҳар ёмоннинг бир яхшиси бор».
АҚШ Оқ уйи матбуот котиби Жен Псаки 14 март куни АҚШ ва унинг иттифоқчилари ўз санкциялари билан Россия иқтисодиётини бутунлай йўқ қилишга эришганини айтганди.
«Буни айтишга ҳали эрта», — дея ўз муносабатини билдирди Песков матбуот қўнғироғи чоғида.
Путин матбуот котибининг таъкидлашича, Россия расмийлари юзага келган қийинчиликлардан ўз манфаати учун фойдаланишга ҳаракат қилмоқда.
«Россия иқтисодиёти қийин аҳволда. Лекин биз бошдан кечираётган ҳар қандай қийинчилик айни пайтда ривожланиш, янгиланиш, янада катта мустақилликка эришиш, янги саноатни барпо этиш ва ҳоказолар учун имкониятлардир. ‘Яхшиликсиз ёмонлик йўқ’ деган яхши мақолимиз бор. Биз мавжуд қийинчиликлардан ўз манфаатимиз йўлида фойдаланишга ҳаракат қиляпмиз», — дейди матбуот котиби.
Аввалроқ Россия учун дефолт таҳдиди нимани англатиши хабар қилинганди. Шунингдек, Россияликлар Telegram’да валюта савдосини бошлагани ҳақида хабар берилди.
