Ukrainadan evakuatsiya qilinadigan oʻzbekistonliklarni olib kelish uchun Toshkentdan Polshaning Katovitse shahriga maxsus samolyot joʻnab ketdi. Hozirgi paytda “Katovitse” (Polsha) aeroportiga 262 nafar Oʻzbekiston fuqarosi olib kelingan. Bu haqda “Dunyo” agentligi xabar berdi.
28 fevral kun Oʻzbekiston poytaxtidan parvoz qilgan Uzbekistan Airways AJ maxsus samolyoti Toshkent vaqti bilan soat 12:45da “Katovitse” aeroportiga qoʻnadi.
Oʻzbekistonning Kiyevdagi elchixonasidan olingan maʼlumotga koʻra, Ukrainaning “Krakoves” nazorat punkti orqali oʻzbekistonliklarni oʻtkazishni tezlashtirish maqsadida 7 ta avtobus ijaraga olingan. Ular koʻmagida shu paytgacha Ukraina-Polsha chegarasiga 11 marta qatnov amalga oshirilgan.
Ayni paytga qadar 560 nafardan koʻproq fuqaro Polsha davlat chegarasini kesib oʻtgan.
“Polshaning chegara hududida Oʻzbekistonning Varshavadagi elchixonasi xodimlari tomonidan tashkiliy masalalar hal qilinmoqda. Chegarada yurtdoshlarimiz oziq-ovqat bilan taʼminlanmoqda, keksalar va yosh bolali ayollarning dam olishi uchun sharoit yaratilgan”, deyiladi xabarda.
Avvalroq Uzbekistan Airways Kiyevga parvozlarni bekor qilgani haqida xabar berilgandi.
