Soʻngi voqealar fonida gʻarbning sanksiyalari ostida qolgan Rossiya dunyo iqtisodiyotida muhim oʻrin tutmasligini koʻrsatdi. Bu haqda iqtisodchi Behzod Hoshimov yozmoqda.
Uning qayd etishicha, Rossiya fond birjasining tarixiy qulashi sodir boʻlganiga qaramasdan, dunyo bozorlari musbat raqamlar bilan yopilgan.
“Tabiiyki, dunyoning 2 foiz iqtisodiyoti ham Rossiyaga toʻgʻri kelmagani uchun, Rossiyada tarixiy qulash sodir boʻlishi dunyo bozorida bir tomchidek narsa”, — deydi tahlilchi.
Hoshimovning soʻzlariga koʻra, ayrim tahlilchilarning mulohazasi va ayniqsa Rossiyadagi mulohaza berayotganlar Rossiya qanchalik kichik mamlakat ekanini unutib qoʻygandek ish tutadi.
“Masalan Rossiya banklariga sanksiyalar ham dunyo moliya bozori uchun bir koʻrinadigan narsa emas”, — deya qayd etadi iqtisodchi.
Iqtisodchining taʼkidlashicha, gʻarb oʻzi uchun haqiqatan ogʻriqli sanksiyalar — masalan, Eron darajasida sanksiyalar (rus eksportiga taqiq) qoʻllasagina bu agressiyaga munosib harakat qilgandek boʻlar edi. Hozirgi sanksiyalar ancha yengil va gʻarb uchun deyarli “bepul”, deya hisoblaydi Hoshimov.
Avvalroq nima uchun Rossiyaga qarshi sanksiyalar ish bermasligi xabar qilingandi.
