Shavkat Mirziyoyev 10 fevral kuni Samarqand shahriga keldi. Davlat rahbari Samarqand xalqaro aeroportida yaratilayotgan sharoitlarni koʻzdan kechirdi.
Prezident matbuot xizmatining yozishicha, bu “havo darvozasi” qariyb 83 million dollarlik loyiha evaziga yangidan qurilmoqda. 2021 yil uchish-qoʻnish yoʻlagi qayta qurilgan edi. Bugungi kunda yangi terminal toʻliq tiklanib, pardozlash ishlari olib borilmoqda. Yoʻl, avtoturargoh va yoritish ustunlari barpo etilmoqda.
“Mirzo Ulugʻbekning buyuk merosi Samarqandning timsoliga aylangan. Shu bois yangi aeroport binosi alloma bobomizning ʻZiji jadidi Koʻragoniyʻ kitobi shaklida barpo etilgan”, deyiladi xabarda.
Qayd etilishicha, terminalning eni 175, balandligi 25 metr. Bir soatda 800 nafar yoʻlovchiga xizmat koʻrsatish quvvatiga ega boʻladi.
Aeroportda “ochiq osmon” rejimi qoʻllaniladi, kargo xizmati ham yoʻlga qoʻyiladi. Yangi terminal kelgusi oyda foydalanishga topshiriladi.
