Россиянинг Smartavia авиакомпанияси Санкт-Петербургдан Наманганга мунтазам қатновларни йўлга қўймоқда. Бу ҳақда Uzbekistan Airports матбуот хизмати хабар берди.
Қайд этилишича, бугун, 2 декабрь куни Санкт-Петербургдан биринчи мунтазам қатновларни амалга оширган Россиянинг Smartavia авиакомпаниясининг ҳаво кемаси Наманган халқаро аэропортига келиб қўнган.
«Анъанага кўра, самолёт тантанали равишда сувли арка билан кутиб олинди», дейилади хабарда.
Хабарга кўра, Санкт-Петербург–Наманган–Санкт-Петербург йўналиши бўйича мунтазам авиақатновлар ҳар пайшанба куни Boeing-737 самолётларида амалга оширилади.
Аввалроқ «Аэрофлот» авиакомпанияси Санкт-Петербург–Наманган–Санкт-Петербург йўналиши бўйича мунтазам қатновларни йўлга қўйгани хабар қилинганди.
