Крис Колумбнинг «Уйда ёлғиз» фильми суратга олинган уй ижарага берилади. Бу ҳақда турар-жойларни ижарага бериш онлайн платформаси – Airbnb’да эълон берилган.
«Дам олиш мавсумини Макаллистерлар услубида нишонланг. Тарихда биринчи марта ‘бузуқ одамлар’нинг бир жамоаси ‘Уйда ёлғиз’ ҳикояси бошланган уйда таътилга чиқиши мумкин», дейилади Airbnb Instagram саҳифасида.
Қайд этилишича, уйда тўртта меҳмонхона ва иккита ётоқхона мавжуд бўлиб, улар, аллақачон, Рождество учун безатилган. Совға сифатида барча меҳмонларга фильмдан илҳомланган LEGO конструкциялари тўплами берилади. Уйнинг Airbnb’даги тавсифи фильмнинг бош қаҳрамони Кевиннинг акаси Базз Маккаллистер номидан тузилган.
«Маккаллистерлар кўп йиллар олдин Парижга кетишган. Гарчи ҳозир бизнинг ёшимиз ўтиб, донороқ бўлиб қолган бўлсак ҳам, байрам ҳазиллари учун ҳеч қачон қарилик қилмаймиз», — деб ёзади уй эгаси.
Маълумот учун, уй Иллинойс штатининг Уиннетка қишлоғида жойлашган. Уни 7 декабрдан бошлаб фақат бир кечага ижарага олиш мумкин бўлади. Ижара нархи кейинроқ эълон қилинади. Airbnb тушган маблағни Чикагодаги «Ла Рабида» болалар шифохонасига ўтказади, у ерда оғир касал болалар даволанади.
Аввалроқ Япония пойтахти Токиода Швециянинг IKEA компанияси ойига 0,86 долларга квартираларни ижарага беришни бошлагани ҳақида хабар берилганди.
