Seul shahrida 26 noyabr kuni Oʻzbekiston va Koreya bosh vazirlari oʻrinbosarlarining 4-Yigʻilishi boʻlib oʻtdi. Bu haqda Investitsiyalar va tashqi savdo vazirligi matbuot xizmati xabar berdi.
Maʼlum qilinishicha, yigʻilishda Oʻzbekiston delegatsiyasiga bosh vazir oʻrinbosari — investitsiyalar va tashqi savdo vaziri Sardor Umurzoqov, Koreya delegatsiyasiga esa bosh vazir oʻrinbosari — iqtisodiyot va moliya vaziri Xong Nam Ki boshchilik qilgan.
Qayd etilishicha, Oʻzbekiston va Koreya oʻrtasidagi investitsiyaviy, savdo-iqtisodiy va madaniy-gumanitar hamkorlikning barqaror ijobiy dinamikasi qayd etilgan. 2021 yil boshidan buyon Oʻzbekistonning Koreyaga amalga oshirilgan eksporti oʻtgan yilning shu davriga nisbatan 9 foizga, Oʻzbekiston iqtisodiyotiga jalb qilingan toʻgʻridan-toʻgʻri Koreya investitsiyalarining umumiy hajmi esa 7 milliard dollardan oshgan.
Shuningdek, Oʻzbekiston tomoni Koreya hukumatining Oʻzbekiston, Qozogʻiston va Turkmaniston bilan oʻzaro savdo hajmini 2023 yilga borib 10 milliard dollarga yetkazishni koʻzlab olib borilayotgan “Yangi Shimoliy siyosat”ini qoʻllab-quvvatlashga sodiqligini hamda ushbu tashabbus doirasida yangi loyiha va dasturlarni amalga oshirishga tayyorligini bildirgan.
Shu bilan birga, Koreyaning KOICA Xalqaro hamkorlik agentligi yordamida Oʻzbekistonda qiymati 32 million dollarga teng boʻlgan 130 ta loyiha amalga oshirilgani va Koreyada oʻzbek mutaxassislari uchun 2 mingdan ortiq amaliyot kurslari tashkil etilgani qayd etilgan. KOICA bilan 2022–2024 yillarga moʻljallangan yangi Hamkorlik dasturini shakllantirish bilan bogʻliq masalalar muhokama qilingan. Tomonlar boʻlajak oliy darajadagi tashrif davomida hujjatni imzolash maqsadida uni nihoyasiga yetkazishga kelishib olgan.
Avvalroq Sardor Umurzoqov Seulda Oʻzbekistonning JSTga aʼzo boʻlishi masalasini muhokama qilgani haqida xabar berilgandi. Shuningdek, Oʻzbekistonning tashqi savdo aylanmasida yuqori ulushga ega davlatlar xabar qilindi.
