Ўзбекистонда хеджирлаш хизматлари кўрсатадиган ихтисослашган молия институти ташкил этилиши мумкин. Бу Марказий банкнинг 2027–2029 йилларга мўлжалланган пул-кредит сиёсати асосий йўналишлари лойиҳасида айтилган. Ҳужжатга кўра, институтнинг ҳуқуқий асослари яратилади ва унинг операциялари халқаро стандартларга мувофиқ ташкил этилади.
Хеджирлаш — валюта курси ёки фоиз ставкаси ўзгаришидан келиши мумкин бўлган зарардан олдиндан ҳимояланиш. Масалан, импортчи бир неча ойдан кейин тўлайдиган долларни бугун келишилган курсда сотиб олиш шартномасини тузиши мумкин.
Шу билан бирга, ички валюта бозорида форвард, своп ва бошқа инструментлардан фойдаланиш имкониятлари кенгайтирилади. Форвард — валютани келажакда олдиндан келишилган курсда сотиш ёки сотиб олиш шартномаси. Алмашув курси шаклланишида бозор механизмлари ва маркет-мейкерларнинг роли кучайтирилади. Маркет-мейкер — бозорда доимий равишда валюта сотиш ва сотиб олиш нархини эълон қилиб турадиган иштирокчи.
Ҳужжатда пул бозорини ривожлантириш режалари ҳам бор. Банклараро пул ва РЕПО бозорлари фаоллигини ошириш, UZONIA ставкасига боғланган молиявий инструментлардан фойдаланишни кенгайтириш ҳамда фоиз своплари бозорини ривожлантириш кўзда тутилган.
Марказий банк улгуржи рақамли валюта бўйича тажриба-синов ишларини ҳам олиб боради. Бу — фақат банклар ва тўлов ташкилотлари ўртасидаги ҳисоб-китобларда ишлатиладиган рақамли сўм. Регулятор рақамли активларнинг пул-кредит сиёсати ва молиявий барқарорликка таъсирини ҳам баҳолайди.
Хеджирлаш институти қачон ташкил этилиши ва унга ким эгалик қилиши ҳужжатда кўрсатилмаган.
Олдинроқ Марказий банк улгуржи рақамли сўмни 2029 йил охиригача муомалага чиқариши мумкинлиги хабар қилинганди.
