2026 йил 1 сентябрь ҳолатига кўра, Ўзбекистондаги банкларда муаммоли кредитлар миқдори 24 трлн 23 млрд сўмга етди. Марказий банк мазкур кўрсаткич йил бошида 18 трлн 55 млрд сўм бўлганини билдирди. Бунда саккиз ой давомида ўз муддатида қайтарилмаган қарзлар миқдори салкам 6 трлн сўмга (33 фоиз) ортган.
Муаммоли кредитларнинг 16,54 трлн сўмдан ортиқ қисми (69 фоиз) давлат банкларига тегишли. Йил бошида бу кўрсаткич 12,83 трлн сўм эди. Саккиз ойлик ўсиш — 3,7 трлн сўм.
Кечиккан қарзлар портфелида Агробанк ва Миллий банк улуши энг йирик қийматни ташкил этган (ҳар бири 3,2 трлн сўмдан). Ўз навбатида Микрокредитбанк муаммоли кредитлари қолдиғи 2,14 трлн сўмдан ошган. Мазкур банк муддатида ундирилмаган қарзлар ўсиши бўйича “пешадамлик” қилган бўлиб, қиймат январь-август ойларида қарийб 1,24 трлн сўмга кўпайган.
Муаммоли кредитларнинг 7,5 трлн сўмга яқини хусусий банклар ажратган қарзлардан шаклланган. Йил бошиги қиймат эса 5,2 трлн сўм бўлган. Яъни саккиз ойлик ўсиш 2,3 трлн сўмни ташкил этган.
Хусусий банклар орасида энг йирик муаммоли кредитлар Капитал банкда шаклланган — 1,15 трн сўм. Шу билан бирга, Ипотека-банк (1,1 трлн сўм), Анорбанкънинг (1,1 трлн сўм) ва TBC банк (1,03 трл сўм) ўз муддатида ундира олмаган қарзлар улуши катта. Саккиз ой ичида Анорбанк портфелидаги муаммоли кредитлар энг кўп ўсган — 632 млрд сўм.
