UzAuto Motors 7-октабрдан Chevrolet Cobalt ва Damas автомобилларини банк иштирокисиз, тўғридан-тўғри бўлиб тўлашга сотишни бошлади. Бу ҳақда компания матбуот хизмати хабар берди.
Унга кўра, Cobalt учун бошланғич тўлов автомобиль нархининг 50% ини ташкил этади, қолган маблағ 24 ой давомида тўланади. Damas учун эса бошланғич тўлов 30% этиб белгиланган. Қолган маблағни 30 ой давомида бўлиб тўлаш мумкин.
Бунда Cobalt учун ойлик тўлов 3 млн 252 минг сўмдан, Damas учун эса 2 млн 173 минг 640 сўмдан бошланади.
Компанияда қайд этилишича, автомобиллар сони чекланган ҳамда юқоридаги ҳисоб-китоблар бошланғич комплектациялар учун келтирилган. Тўлов миқдори танланган комплектацияга қараб фарқланиши мумкин.
Автомобиль ишлаб чиқарувчиси жорий йилнинг февраль ойида Янги Chevrolet Damas Max ва Chevrolet Damas Move моделларини сотувга чиқарди.
