Асосий мазмунга ўтиш
Жонли маълумот 19ноябр · Пайшанба
USD 12 010,45 ▼ −13,16 EUR 13 200,69 ▼ −36,10 RUB 145,64 ▲ +0,10 GBP 15 842,98 ▼ −22,17
Маълумот: Марказий банк
Авто

Автомобиль бозорида Chevrolet улуши камайди, BYD’ники эса деярли икки бараварга ошди

Йил бошидан бери янги енгил автомобиллар савдоси 6,5 фоизга камайди, Хитой брендлари эса деярли 1,5 баробар ўсди. Энг сезиларли пасайиш BYD Chazor Champion, KIA Sonet, Tracker, Haval Jolion ва Chevrolet Labo автомобилларида қайд этилди.

2026 йил январь-октябрь ойлари якуни бўйича янги автомобилларнинг умумий сотув ҳажми 318 949 донани ташкил этди. Кўрсаткич йилнинг мос даврига нисбатан 22 257 дона автомобилга ёки 6,5% га камайди, дея хабар беради Автомобиль бизнеси ассоциацияси.

Жорий йил октябрь ойида Ўзбекистонда 36 176 дона янги автомобиль сотилди. Бу ўтган йилнинг мос даврига нисбатан деярли 12% га кам, бироқ сентябрь кўрсаткичидан 6,3% га кўп.

Октябрь ойида сентябрга нисбатан Soueast (+75,3%), Geely (+29,8%), Chevrolet (+13,4%) ва Chery (+9,1%) брендлари ижобий сотув динамикасини намойиш этди. Энг сезиларли пасайиш Depal (−62,7%), Changan (−61,3%), Li Xiang (−51,4%) ва Haval (−47,1%) брендларида қайд этилди.

Моделлар кесимида мутлақ ҳисобда сотувларнинг энг юқори ўсиши Chevrolet Cobalt (+2 175 дона автомобиль), Damas (+1 843), BYD Song Plus DM-i Champion (+496), BYD Yuan Up DM-i (+246) ва Soueast Co8 DM (+195) автомобилларида кузатилди.

Шу билан бирга, энг сезиларли пасайиш BYD Chazor Champion (−820 дона автомобиль), KIA Sonet (−506), Tracker (−456), Haval Jolion (−325) ва Chevrolet Labo (−268) автомобилларида қайд этилди.

2026 йилнинг ўн ойи якунларига кўра, Chevrolet 74% улуш билан Ўзбекистон автомобиль бозорининг етакчиси бўлиб қолмоқда, бу ўтган йилнинг шу даврига нисбатан 7,8 фоиз пунктига камайган. Иккинчи ўринни 12,3% (+1,5 фоиз пункти) улуш билан ADM Global, учинчи ўринни 10,7% (+5,1 фоиз пункти) билан BYD эгаллади.

Бозорнинг асосий тенденцияларидан бири Хитой автомобиль брендларининг мавқейини мустаҳкамлаш бўлиб қолмоқда.

Январь-октябрь ойлари якунларига кўра, уларнинг умумий улуши 2025 йилнинг шу даврига нисбатан 6,8 фоиз пунктига ошиб, 18,4% га етди. Шу билан бирга, автомобиль бозорининг умумий қисқаришига қарамай, Хитой автомобиллари сотуви 48,2% га ошди.

Ҳудудлар кесимида ўн ойда энг кўп янги автомобиллар Тошкент шаҳри (92 567 дона), Самарқанд (25 899) ва Фарғона (25 132) вилоятларида сотилган. Энг кам сотув ҳажми Қорақалпоғистон Республикаси (9 384) ва Сирдарё вилоятида (4 952) қайд этилган.