Ўзбекистонда 2022 йилнинг 11 ойи давомида хорижий компаниялар томонидан 44,8 миллиард сўм солиқ тўлангани маълум қилинди. Бу ҳақда Давлат солиқ қўмитаси матбуот хизмати хабар берди.
Қайд этилишича, 2022 йил 1 декабрь ҳолатига кўра, мамлакатда электрон хизматлар кўрсатувчи 40 та хорижий компания рўйхатга олинган бўлиб, 2 йил ичида уларнинг сони икки бараварга ошган.
Ҳисоботга кўра, 2022 йилнинг 11 ойи давомида хорижий электрон хизматлар кўрсатиш компаниялари 44,8 миллиард сўм солиқ тўлаган. Бунда тўланган солиқларнинг 98 фоизи 10 та компания ҳиссасига тўғри келган. Жумладан:
- Meta — 18,6 миллиард сўм;
- Google — 14,8 миллиард сўм;
- Apple — 6,2 миллиард сўм;
- Booking.com — 1,4 миллиард сўм;
- Netflix — 867,7 миллион сўм;
- Xsolla — 798,1 миллион сўм;
- Yandex — 445,5 миллион сўм;
- Paddle.com — 404,2 миллион сўм;
- LinkedIn — 234,1 миллион сўм;
- Adobe Systems — 180,3 миллион сўм солиқ тўлаган.
