Россиянинг Aurus компанияси ҳашаматли Komendant кроссоверини намойиш қилди. Бу ҳақда «ТАСС» хабар бермоқда.
Автомобиль Москва Кремлининг Комендант минораси шарафига номланган. Кроссовер 598 от кучига эга гибрид V8 двигатели билан жиҳозланган бўлиб, 100 км/соат тезликка эришиш учун 6,5 сония вақт кетади.
Таъкидланишича, автомобилдаги эҳтиёт қисмларнинг қарийб 70 фоизи маҳаллий ҳисобланади. Кроссовернинг нархи 33,7 миллион рублни ташкил этади. Бренд бош директори Николай Ходосевичнинг сўзларига кўра, моделнинг тижорат сотуви 2023 йилнинг биринчи чорагида бошланади.
«Бу йил синов учун мўлжалланган ва сотувга чиқарилмайдиган автомобиллар серияси ишлаб чиқарилади. Тижорий сотувлар келаси йилнинг бошида бошланади», – дейди у.
Моделнинг интерери замонавий ички ёритиш, аудиотизим, орт қатордаги йўловчилар учун иккита алоҳида мониторли мультимедиа тизими, шунингдек, массаж, вентиляция ва хотира функциялари ўрнатилган қулай ўриндиқлар билан жиҳозланган.
