Skoda компанияси Enyaq iV асосидаги электр купе-кроссовер — Enyaq Coupe iV’ни расман тақдим этди. Бу ҳақда «Коммерсантъ» хабар берди.
Маълум қилинишича, янгилик ўзининг кузов тури ва янада бой жиҳозлар, жумладан панорамали том, 19 дюймли ғилдираклар ва 13 дюймли сенсорли экранга эга мултимедиа тизимини олган. Ўзгартиришлар сони тўрттагача чекланади.
Савдо аввалида компания 62 киловатт/соатлик аккумулятор билан жиҳозланган 179 от кучига эга бир моторли Enyaq Coupe iV 60 ҳамда 82 киловатт/соатлик аккумулятор билан жиҳозланган 204 от кучига эга бир моторли Enyaq Coupe 80 iV моделларини таклиф қилади.
Флагман версиялар 82 киловатт/соатлик аккумулятор билан жиҳозланган иккита электромоторли 265 от кучига эга Enyaq Coupe iV 80х ва 306 от кучига эга, 20 дюймли ғилдираклар ва пасайтирилган спорт осмаларига эга Enyaq Coupe RS iV бўлади.
Маълумот ўрнида, Skoda Enyaq iV асосий электр кроссовери 2020 йилнинг сентябрь ойида намойиш этилганди. Янги купе-кроссовер 2022 йилнинг баҳорида сотувга чиқарилади.
Аввалроқ Skoda компанияси янгиланган Karoq кроссоверини тақдим этгани хабар қилинганди.
