Рэпер ва бизнесмен Тимур Юнусов (Тимати) ва ресторатор Антон Пинский Россиядаги Starbucks қаҳвахоналар тармоғининг барча активларини сотиб олди. Бу ҳақда Forbes нашри хабар берди.
«Эндиликда расман Starbucks тармоғининг барча активлари сотиб олинди ҳамда тармоқ энди мен ва Антон Пинскийнинг назорати остида», — деб ёзган у.
Қўшиқчи харид шартномасининг миқдори ва бошқа тафсилотларини очиқламаган.
Тиматнинг сўзларига кўра, янги бренд остидаги қаҳвахоналар август ойида очилади.
«Қаҳвахоналарнинг ‘даҳшатлиʼ ребрендинги режалаштирилмаган», — деган репер.
У хоҳловчиларни янги дизайн ва логотип ишлаб чиқишда иштирок этишга таклиф қилган.
Starbucks 2022 йил март ойидан ўз маҳсулотларини Россияга етказиб беришни тўхтатди. 23 май куни компания Россиядаги бизнесини бутунлай тарк этишини маълум қилди. Starbucks’нинг Россияда 130 та шохобчаси мавжуд бўлиб, уларда икки мингга яқин киши ишлайди.
Россиялик ресторатор Антон Пинский июль ойи ўрталарида Forbes нашрига у ва Тимати, шунингдек, сенатор Арсен Каноковга тегишли «Синдика» компанияси Россия Starbucks бизнесининг янги эгалари бўлишини айтди.
«Спарк» маълумотларига кўра, июль ойида Starbucks’нинг Россиядаги юридик шахси «Кофе Сирена» мулкни, жумладан, бинолар, қаҳва, озиқ-овқат тайёрлаш ускуналари ва мебелларни гаровга қўйиш бўйича шартнома тузган. Ушбу шартномага кўра гаров эгаси «Трейдкон» акционерлик жамияти компанияси бўлиб, унинг бенефициари Мадина Арсеновна Канокова (Арсен Каноковнинг қизи) ҳисобланади.
Ресторан инвестори Александр Сисоев ўзининг Телеграм-каналида Пинский савдо марказларидаги нуқталарини эмас, балки «биринчи навбатда энг қизиқарли жойларни» сотиб олишини ёзди.
Forbes билан суҳбатда «Infoline-аналитики»» бош директори Михаил Бурмистров жиддий чегирма туфайли битим 700 миллион рублни ташкил қилиши мумкинлигини айтди. CORE.XP чакана савдо бўлими бошлиғи Марина Малахатько эса шартномани унинг тузилиши ва пакетига қараб 1,6-3 миллиард рубль оралиғида баҳолади.
Аввалроқ Starbucks Буюк Британия бозорини тарк этиши мумкинлиги хабар берилганди. Ҳозирча аниқ келишувлар мавжуд эмас, компания вариантларни кўриб чиқмоқда. Starbucks’нинг бозорни тарк этиш қарорига Pret A Manger, Tim Hortons va Kosta тармоқлари билан юқори рақобат сабаб бўлган.
