Exadel халқаро компаниясининг Ўзбекистондаги офиси раҳбари Юлия Яковлева релокантларга яратилган шароитлар учун Шавкат Мирзиёевга миннатдорчилик билдирди. Бу ҳақда Президент матбуот хизмати хабар берди.
Таъкидланишича, мазкур корхонага 1998 йили Кремний водийсида асос солинган. Корхонанинг Ўзбекистондаги бўлинмаси раҳбари Юлия Яковлева мамлакатда IT соҳасини ривожлантириш учун амалга ошираётган ишлари учун Президентга миннатдорчилик билдирган.
«Булар Ўзбекистоннинг ўзи учун ҳам, бозорга кириб келаётган халқаро компаниялар учун ҳам жуда муҳим. Айниқса ҳодимларни релокация қилишда берилаётган ёрдам учун алоҳида раҳмат демоқчиман.
Жуда кўп мамлакатлар IT соҳасидаги мутахассисларни қабул қилишга тайёрлигини билдирмоқда, лекин Ўзбекистонда биз 7 кун 24 соатлик ёрдам олдик. Исталган вақт, релокация учун мамлакат танлашдан бошлаб, ҳодимларнинг бу ерга мослашишигача телефон қилиб керакли ёрдамни олиш имкони бўлди.
Одамнинг яшаш жойини ўзгартириши катта стрессли жараён. Бизнинг идоралар берган баҳога кўра, Ўзбекистон релокация учун энг «дўстона» мамлакат бўлди. Бунинг учун ҳам раҳмат — дейди у.
Унинг таъкидлашича, компания Ўзбекистонда ривожланиш бўйича яқин келажак учун катта режалар қилган.
Ҳозир бизда 120 нафар дастурчи бор ва биз айнан шу минтақада тезлик билан ривожланишни режалаштираяпмиз. Ўйлаймизки, Ўзбекистон яқин келажакда IT марказларидан бирига айланади. Сабаби, бозорга кириб келаётган ҳамкорларимиз ҳам бу ерда ривожланиш учун потенциал борлигини таъкидламоқда.
Мен бир кичик таклиф бермоқчиман. Бу соҳада ўз маҳсулотларини яратишни истайдиган мамлакат учун катта бўлмаган стартаплар майдонини яратиш керак. У ерда ёш мутахассислар ўз ишларини кўрсата олиши керак. Ҳозир бундай лойиҳаларга инвестиция киритишга тайёр бўлган халқаро корхоналар, ҳамкорларимиз бор. Лекин улар мавжуд стартап лойиҳалари ҳақида етарли маълумотга эга эмас. Мен айтган стартаплар майдони эса лойиҳаларни танитишга хизмат қилади», — дейди Exadel’нинг Ўзбекистондаги офиси раҳбари.
Аввалроқ Шавкат Мирзиёев «Astrum» академиясида IT соҳаси вакиллари билан учрашгани хабар қилинганди.
«Бугун янги IT академиясига биз учун аҳамияти ниҳоятда юқори бўлган IT соҳасидаги етук мутахассислар ва ёшларимиз билан учрашув ўтказиш учун келдим. Биз бугун биргаликда ечимларини топадиган масалалар бутун Ўзбекистон ёшларининг IT соҳасидаги интилишларига катта туртки ва мотивация беришига ишонаман», — деган учрашувда Президент.
