Volkswagen концернига 2018 йилдан бери раҳбарлик қилиб келаётган Герберт Дисс ўз шахси билан боғлиқ кўп йиллик можаролар сабаб 1 сентябрь куни лавозимини тарк этади. Бу ҳақда Коммерсант нашри хабар берди.
«Бугунги йиғилишда Volkswagen AG кузатув кенгаши Оливер Блумени компаниянинг янги бош директори этиб тайинлади. У 2022 йил 1 сентябрдан бу лавозимни эгаллайди. Бу билан бир вақтда, Герберт Дисс ўзаро келишув асосида бош директор лавозимини тарк этади», дейилади компания пресс-релизида.
Оливер Блуме ўн икки бренддан иборат Volkswagen оиласининг Porsche Sports Cars компанияси раҳбари ҳисобланади. Блуменинг ҳозирги лавозими янгиси билан бирлаштирилади.
Герберт Дисс 2015 йилдан бери компанияда юқори лавозимларда ишлаб келади. Аввалига у Volkswagen Passenger Cars асосий брендини бошқарган, кейин эса бутун концернининг раҳбарига айланганди.
У бир неча бор ишдан бўшатилиш арафасида эди. Охирги марта ишдан кетиш хавфи 2021 йил декабрь ойи бошида пайдо бўлганди. Ўшанда у компаниянинг Вольфсбургдаги штаб-квартирасида 30 минг иш ўринларини қисқартиришни таклиф қилган ва бу ходимларнинг норозилигига сабаб бўлганди. 2019 йилда эса компания йиғилишида нацистлар шиори билан сўз ўйини қилган ва кейинроқ бу иши учун узр сўраганди.
Эслатиб ўтамиз, Volkswagen апрель ойида Россияда автомобиль ишлаб чиқариш ва мамлакатга экспорт қилишни тўхтатганди.
