Европа Иттифоқи Марказий Осиёнинг Россия энергетикасига қарамлигини камайтириш мақсадида Тожикистондаги Роғун ГЭСи қурилишининг асосий инвесторига айланади. Бу ҳақда Reuters Европа расмийларига таяниб ёзмоқда.
Европа инвестиция банки (ЕИБ) Италиянинг Webuild қурилиш компанияси томонидан амалга оширилаётган ГЭС қурилишини ҳали молиялаштирмаган, бироқ шу ҳафта бошида Европа комиссияси банкдан лойиҳанинг энг йирик инвестори бўлишни сўраган эди.
Унинг қўшимча қилишича, ЕИБ Европа Иттифоқи буджетини назорат қилувчи ва бозорларда пул тўплаши мумкин бўлган Еврокомиссия билан қўшма сармоя киритиш имкониятини кўриб чиқмоқда.
Европа Иттифоқининг юқори мартабали расмийси блок лойиҳани молиялаштириш масаласини кўриб чиқишга тайёрлигини тасдиқлади. ЕИБ вакили келажакдаги инвестициялар ҳажми ва сабаблари ҳақидаги саволларга жавоб беришдан бош тортди.
Оммавий ахборот воситалари билан гаплашишга рухсати бўлмагани учун исмини ошкор этишдан бош тортган европалик расмийнинг айтишича, Европа Иттифоқи Тожикистон ва унинг қўшниларини Россия энергетикасидан мустақил қилиш учун ГЭСнинг асосий инвестори бўлмоқчи.
Европа Иттифоқи «Марказий Осиёнинг Россиядан энергетик мустақиллигига эришмоқчи», деди у.
Роғун ГЭСининг қурилиш жараёни
Тожикистоннинг тўлиқ энергетик мустақиллигини таъминлашга мўлжалланган Роғун ГЭСи қурилиши 2016 йилдан бери давом этмоқда.
«Бутун лойиҳа тахминан 8 миллиард долларга тушиши кутилмоқда, шундан 3 миллиард доллари аллақачон сарфланган», — деди июнь ойида Тожикистон энергетика вазири Далер Жума.
Музокаралардан хабардор Европа Иттифоқи расмийсининг айтишича, шу пайтгача лойиҳа асосан Тожикистон давлат облигациялари ва хусусий кредитлар ҳисобидан молиялаштирилган, бироқ Душанбе қурилишни якунлаш учун аввалроқ ЕИга молиявий ва технологик тарафдан ёрдам сўраб мурожаат қилган.
Лойиҳа тугаллангач, Роғун ГЭСининг баландлиги 335 метр бўлган тўғони дунёдаги энг баланд тўғонга айланиши кутилмоқда.
ЕИнинг станция қурилишига сармоя киритиш бўйича якуний қарори 2022 йилнинг тўртинчи чорагида қабул қилиниши мумкин. Тожикистон ҳукумати бу борада изоҳ беришдан бош тортган.
