Vazirlar Mahkamasining topshirigʻiga koʻra Respublika ishchi guruhi tomonidan Qoraqalpogʻiston respublikasi hamda Xorazm va Navoiy viloyatlarida “Sanitariya inqilobi” boʻyicha oʻrganish ishlari oʻtkazildi. Bu haqda Turizm va madaniy meros vazirligi matbuot xizmati Kommers.uzʻga xabar berdi.
Xususan, 13–18 iyun kunlari Qoraqalpogʻiston Respublikasida, 20–25 iyun kunlari Xorazmda va 27 iyun – 2 iyul kunlari Navoiyda bir qator turizm obyektlari oʻrganildi.
Natijada obyektlarda sanitar-gigiyenik, texnik xavfsizlik, yongʻin xavfsizligining oldini olish talablariga javob bermaslik, jismoniy imkoniyati cheklangan, nogironligi boʻlgan shaxslar, yosh bolali ota-onalar uchun zaruriy shart-sharoitlar yaratilmaganligi kabi kamchiliklar aniqlanib, muhokama qilindi.
Tegishli hokimliklar, vazirlik va idoralar rahbarlariga xato-kamchiliklarni zudlik bilan bartaraf etish topshirildi.
Maʼlumot uchun, Oʻzbekiston Vazirlar Mahkamasining topshirigʻiga muvofiq, 2022–2023 yillarda respublikadagi barcha turizm namoyishi obyektlari (madaniy meros obyektlari, ziyoratgohlar, turizm zonalari, mehmonxonalar, sihatgoh va dam olish zonalari, sport-sogʻlomlashtirish muassasalari, ommaviy namoyish joylari, madaniyat va istirohat bogʻlari, ommaviy bozorlar), aeroport, vokzal va avtoshoxbekatlarda “Sanitariya inqilobi”ni amalga oshirish koʻzda tutilgan.
Unga koʻra, respublikamizdagi barcha turizm namoyishi obyektlarida sanitariya-gigiyena shoxobchalarining mavjudligi, sanitariya va shaharsozlik normalari hamda qoidalari talablariga muvofiqligi boʻyicha xatlov oʻtkaziladi.
Sanitariya-gigiyena shoxobchalari mavjud boʻlmagan turizm namoyishi obyektlarida zamonaviy sanitariya-gigiyena shoxobchalari qurilishi va taʼmirlanishi taʼminlanib, ularda jismoniy imkoniyati cheklangan va nogironligi boʻlgan shaxslar, yosh bolali ota-onalar uchun zaruriy shart-sharoitlar yaratilganligiga eʼtibor qaratiladi.
