Германиянинг Берлин шаҳридаги Tesla автомобиль йиғиш заводи 11 июлдан бошлаб икки ҳафтага ишни тўхтатади. Бу ҳақда Германиянинг Bild журнали хабар берди.
Маълум қилинишича, компания заводда ишлаб чиқариш жуда секин кечмоқда деб ҳисоблайди ва иш жараёнларини 14 кун ичида қайта тикламоқчи.
Tesla Берлинда йилига 500 мингта Model Y ишлаб чиқаришни режалаштирмоқда. Бироқ ҳозирча завод ҳафтасига атиги 1000 дона ишлаб чиқармоқда, бу мақсаднинг ўндан бир қисми, кўплаб автомобиллар нуқсонлар туфайли қайта ишланиши керак.
Журналнинг қўшимча қилишича, 4500 нафар ходимдан қанчаси ишдан бўшатилади ва қанчаси ишлашда давом этиши ҳозирча аниқ эмас. Бироз танаффусдан сўнг корхонада икки смена ўрнига уч сменада иш олиб борилади.
Айрим манбаларга кўра, бироз танаффусдан сўнг Tesla Берлиндаги завод ходимларини сезиларли даражада кўпайтиришни режалаштирмоқда.
Манба ишчи кучининг кенгайишини учинчи сменанинг пайдо бўлиши билан эмас, балки ишлаб чиқаришнинг тезлашиши зарурлиги билан изоҳлади: бунинг учун унинг деярли барча босқичларида янги ишчи кучи керак бўлади.
Бундан ташқари, Tesla августдан завод ходимларининг маошларини оширади, менежерлар бундан мустасно.
Аввалроқ Tesla’нинг чораклик автомобиль етказиб бериш ҳажми икки йилда биринчи марта камайгани ҳақида хабар берилганди.
