Тошкент шаҳар ҳокими Жаҳонгир Ортиқхўжаев бизнес тренинглардан бирида янги иш бошлаётган тадиркорларни пластик карталар ўрнига нақд пул билан муомала қилишга чақирганди. MyTaxi ва Express24 хизматлари раҳбари Акмал Пайзиев шаҳар ҳокимининг ушбу сўзларига ўз муносабатини билдирди.
Тадбиркор фикр билдиришдан олдин Жаҳонгир Ортиқхўжаев билан ҳеч қандай алоқаси йўқлигини таъкидлади.
«Менинг Жаҳонгир ака билан алоқадор жойим йўқ. Ҳеч қандай бизнесларда ёрдам бермайди, умидвор жойимиз ҳам йўқ. Лекин Жаҳонгир ака тадбиркор сифатида кўп нарсани қоғозга ўрамасдан, тўғри айтиб қўяди: жуда тўғри гапларни айтади аммо уни бошқача ҳам талқин қилиш мумкин», — дейди тадбиркор.
Унинг айтишича, пластик карталар тўғрисидаги гапларни танқид қилаётганлар — бу замонавий банк тизимларини қўллаб-қувватлаётган одамлар. «Ихтиёрий технологияни плюс ва минус тарафлари бўлганидек, пластик карталарни ҳам минус тарафи бор».
«Яъни сиз физик нарсанинг виртуал нарсага айланиши оқибатида у билан алоқани қайсидир маънода йўқотасиз. Карталардаги пулни ишлатаётганингизда нақд пул ишлатаётгандек кўп жавобгарликни ҳис қилмайсиз. У — кўринмаётган пул: қанақадир рақамлар камаяди, қанақадир рақамлар кўпаяди, сиз эса уни мобил иловалар орқали кузатиб турасиз. Шунинг учун у ерда унчалик боғлиқлик бўлмайди.
Ҳар бир нақд пулни санаётганда эса сиз уни ҳис қиласиз. Бунда сизнинг сезги органларингиз неча пул ишлаётганингиз, неча пул олаётганингиз ва пулингиз камаяётганини ҳис қилади. Бундай ҳолатда сизда жавобгарликни кўпроқ сезасиз», — дейди тадбиркор.
Пайзиевнинг таъкидлашича, чет элларда ҳам ёшларга кредит карталар ишлатишдан қочишни тавсия қилишади.
«Кредит карталарда пул олиш ва ишлатиш осон қилиб қўйилган, ўзингиз билмаган ҳолатда сизга келаётган пулдан кўпроқ пул ишлатиб қўйишингиз, савдолашадиган жойда ҳам савдолашмаслигингиз мумкин. Чунки карталардаги пулларни сиз кўрмайсиз, улар виртуал. Пластик карталарни тадбиркорлар ва пули кам бўлган одамлар учун ҳам зарари бўлиши мумкин. Жаҳонгир аканинг фикрларини қайсидир маънода тўғри деб биламан. Бу банк карталаридан кечиш деган нарса эмас», — деди у.
Акмал Пайзиевнинг айтишича, ҳозиргача Нью-Йоркда ҳам ҳатто шунақанги кафе ва ресторанлар бор: умуман банк карталарида тўлов қабул қилмайди, фақат нақд пул олади.
«Агар банк карталаридаги пуллар нақд пуллар билан бир хил бўлса, бу — қулайлик. Уни кимдир ишлатиши, кимдир ишлатмаслиги мумкин. Жаҳонгир ака нақд пулни солиқларни тўлаган ҳолатда ишлатинглар деди. Шунинг учун бу ерда ҳеч қандай ёмон нарса йўқ, жуда тўғри гаплар гапирилди, деб ўйлайман, фақатгина буни кўпроқ блогерларимиз бошқа томонга йўйиб юборди», — дейди у.
Аввалроқ Акмал Пайзиев Express Dookon бизнеси катта зарар туфайли ёпилгани ҳақида хабар берганди.
