Fargʻona-Buxoro-Fargʻona, Fargʻona-Urganch-Fargʻona yoʻnalishida aviaqatnovlar yoʻlga qoʻyiladi. Shavkat Mirziyoyev bu boʻyicha Transport vazirligiga topshiriq berdi.
Prezident raisligidagi videoselektorda aytilishicha, haligacha xalqaro va mahalliy yoʻnalishlarda loukosterlar faoliyati samarali yoʻlga qoʻyilmagani, zamonaviy “Afrosiyob” poyezdiga chipta olish uchun bir necha hafta oldin murojaat qilish zarurligi tanqid qilindi.
Shu bois Transport vazirligiga bir oy muddatda:
- Fargʻona-Buxoro-Fargʻona, Fargʻona-Urganch-Fargʻona yoʻnalishida aviaqatnovlarni;
- Buxoro-Samarqand, Buxoro-Xiva, Buxoro-Termiz yoʻnalishlari boʻyicha zamonaviy avtobus va mikroavtobuslar qatnovini yoʻlga qoʻyish topshirildi.
“Oʻzbekiston temir yoʻllari” bir oy muddatda “Afrosiyob” tez yurar poyezdini Shahrisabzgacha harakatini qayta tiklaydigan boʻldi.
Mutasaddilarga 1 sentyabrga qadar har kuni 2 mingdan ziyod sayyohlarga tarixiy maskanlarni aylanib chiqish imkonini beradigan 2 qavatli muntazam turistik avtobuslar qatnovini yoʻlga qoʻyishga topshiriq berildi.
Avvalroq Buxorodan Istanbulga muntazam aviaqatnovlar yoʻlga qoʻyilishi haqida xabar berilgandi.
