Криптовалюта тўловлари бўйича MoonPay стартапи 87 миллион доллар йиғди. Серия А босқичида 60 дан ортиқ инвестор, жумладан қўшиқчи Жастин Бибер, рэпер Снуп Дог, теннисчи Мария Шарапова ва актёр Брюс Уиллис иштирок этди. MoonPay 3,4 миллиард долларга баҳоланди.
Инвестицияларнинг янги босқичи MoonPay’га криптовалютанинг PayPal’и бўлишига ёрдам беради, деб ёзади The Verge.
MoonPay маълумотларига кўра, 10 миллион мижоз ушбу хизмат орқали қарийб 3 миллиард долларлик транзакцияларни амалга оширган. Компания 260 дан ортиқ хизмат кўрсатувчи провайдерлар, жумладан биржалар (Coinbase, FTX ва OpenSea) ва ҳамёнлар (MetaMask) билан ҳамкорлик қилади.
3iQ Digital Assets бошқарувчи директори Алекс Макдугалнинг айтишича, 2022 йилда 600 дан ортиқ криптостартаплар венчур капитали учун 12,5 миллиард доллардан ортиқ маблағ олди.
«Криптовалюта ва NFT транзакциялари учун тўлов инфратузилмасини таъминловчи MoonPay контент яратувчилардан ўз ишларини тарғиб қилиш ва мухлислар билан мулоқот қилиш учун NFT’дан кўпроқ фойдаланишини кутади», — деди бош директор Иван Сото-Райт.
