Oʻzbekiston tovar-xom ashyo birjasidagi 2022 yilning birinchi choragidagi savdolarda sotuvchi korxonalar qariyb 3 trillion soʻm qoʻshimcha daromad oldi. Bu haqda birja matbuot xizmati xabar berdi.
Maʼlum qilinishicha, 2022 yil yanvar-mart oylarida birjaning barcha savdo platformalarida tuzilgan bitimlarning umumiy hajmi 2021 yilning birinchi choragiga nisbatan 50,6 foizga va 2019 yilning mos davriga nisbatan esa qariyb uch baravarga oʻsib, 26,7 trillion soʻmni tashkil qildi.
Shuningdek, birjada roʻyxatdan oʻtgan yangi mijozlarning soni 2021 yilga nisbatan deyarli toʻrt baravar oʻsib, 33,6 mingta savdo ishtirokchisini tashkil qildi.
Taʼkidlanishicha, birjada mahsulotlar uchun haqiqiy bozor narxlarining shakllanishi natijasida sotuvchi korxonalar qariyb 3,0 trillion soʻmlik qoʻshimcha daromad oldi. Bu 2021 yilning yanvar-mart oylariga nisbatan 2,8 baravar koʻpdir.
Qayd etilishicha, mazkur mablagʻlar sotuvchi korxonalarning ishlab chiqarish salohiyatini kengaytirish va ularning iqtisodiy samaradorligini oshirishga yoʻnaltirilishi mumkin.
Avvalroq Oʻzbekistonda davlatning “oltin aksiya” huquqi bekor qilingani haqida xabar berilgandi.
